فاضل الزھرار کو 1991 میں لبنان جلاوطن کیا گیا تھا

حماس کے 15 اراکین کی فلسطین واپسی میں حماس کے بانی احمد الملاح اور حماس قائد محمود الزھرار کے بھائی فاضل الزھرار بھی شامل ہیں۔

اسرائیل کے وزیر دفاع شاؤل مفاظ نے فلسطین کو خبردار کیا ہے کہ اگر رفاہ سے شدت پسند غزہ داخل ہوتے رہے تو اسرائیل کے زیر انتظام غزہ میں دخل ہونے والے مقامات بند کر دیے جائیں گے۔

یہ مخصوص مقامات غزہ اور غرب اردن کے درمیان تجارت کے لیے نا گزیر ہیں۔

فاضل الزھرار 1991میں لبنان جلا وطن ہوئے تھے اور 14 سال کے بعد غزہ واپس آرہے ہیں۔

فلسطینی حکومت کا کہنا ہے کہ رفاہ سے تمام فلسطینی شناختی کارڈ رکھنے والے افراد کو غزہ داخل ہونے کی اجازت ہے۔

اسرائیل نے رفاہ کی کراسنگ ستمبر انخلاء کے تھوڑے عرصے بعد ہی بند کر لیا تھا تاکہ مصر سے ہتھیار اور شدت پسندوں کوخفیہ طور پر فلسطین آنے سے روک دیا جائے۔

جمعرات کو مفاظ نے دھمکی دی کہ اسرائیل کے زیر انتظام عریز اور کارنی کراسنگ کو بند کردیا جائے گا ورنہ وہ عالمی سرحد کی حیثیت اختیار کریں گے۔

اسرائیل نے کہا ہے کہ فلسطین طے شدہ معاہدے کے تحت رفاہ پر اسرائیل کی نگرانی میں رکاوٹیں پیدا کر رہا ہے۔ اس معاہدے کے تحت خاص ٹی وی پر رفاہ کی چوبیس گھنٹے اسرائیلی نگرانی کرنے پر اتفاق ہوا تھا۔

امریکی وزیر خارجہ کونڈولیزا رائس نے، جن کی موجودگی میں معاہدہ مکمل کیا گیا تھا، حالیہ تنازعہ کی روشنی میں اپنا نمائندہ اسرائیل بھیج دیا ہے۔

امریکی وزارت خارجہ کے کونسلر فلپ زیلیکوو رفاہ جانے کے علاوہ عریز اور کارنی کی حیثیت پر اور غزہ اور غرب اردن کے درمیان بس چلانے پر بھی بات چیت کرینگے۔