ریاض مسرور بی بی سی اُردو ڈاٹ کام، سرینگر

	فائل فوٹو: سرینگر میں سکیورٹی

فوج نے معاملہ کی تفتیش شروع کردی ہے تاہم مقامی آبادی سراپا احتجاج بنی ہوئی ہے اور لوگوں نے تب تک لاشیں دفنانے سے انکار کردیا ہے جب تک قصور وار فوجیوں کو سزا نہیں دی جاتی۔

پولیس کی طرف سے موصولہ اطلاعات کے مطابق ’سوپور کے مضافات میں گنڈ تجر علاقہ کے ایک آستانہ پر سالانہ عرس کے سلسلہ میں ہزاروں لوگ جمع ہوگئے تھے۔ واپسی پر جب لوگ گاڑیوں میں گھروں کو جا رہے تھے تو سوپور کی طرف واپسی پر فوج نےگاڑیوں کی تلاشی شروع کردی۔‘

’تلاشی مہم کے دوران موٹر سائکل سوار پر دو نوجوانوں کو فوج نے روکنا چاہا لیکن وہ فرار ہوگئے۔ اس دوران وہاں پر موجود نوجوانوں کی بڑی تعداد نے تلاشی کی وجہ سے ٹریفک جام کے خلاف احتجاج کیا اور گاڑیوں کی چھتوں پر چڑھ کر فوج کے خلاف اشتعال انگیز نعرے بازی کی۔‘

’فوج نے فائرنگ کی جس کے نتیجہ میں بُمئی کے رہنے والے محمد امین تانترے اور مسلم پیر سوپور کے رہائشی جاوید احمد کی موت ہوگئی جبکہ فردوس احمد خواجہ نامی نوجوان شدید زخمی ہوگیا۔‘

فوجی ترجمان ڈی کے کچاریہ نے بی بی سی کو بتایا کہ ’ہم معاملہ کی تفتیش کر رہے ہیں۔‘ اس دوران سوپور میں حالات کشیدہ ہوگئے ہیں۔ لوگوں کی بڑی تعداد سڑکوں پر نکل آگئی ہے اور لوگوں نے لاشوں کو تب تک نہ دفنانے کا فیصلہ کیا ہے جب تک صوبائی انتظامیہ قصور واروں کے خلاف کاروائی نہیں کرتی۔

واضح رہے کہ صوبے میں نیشنل کانفرنس اور کانگریس کی مخلوط حکومت بننے کے بعد یہ تیسرا واقعہ ہے جب شمالی کشمیر میں فوج کی فائرنگ میں عام شہریوں کی موت ہوئی ہے۔ اس سے قبل دو واقعات میں دو شہر مارے گئے۔