ریاض مسرور بی بی سی اردو ڈاٹ کام، سرینگر

	سرینگر انٹرنیشنل ائیرپورٹ کا ایک ارب روپے کی لاگت سے چار سال میں تعمیر کیا گیا ہے۔

افتتاحی تقریب سے خطاب کرتے ہوئے سونیا گاندھی نے ریاست میں تعمیر و ترقی کی اہمیت بتائی اور کہا کہ پچھلے سال نومبر۔دسمبر میں یہاں ہونے والے پُرامن انتخابات میں لوگوں کی بھاری شمولیت اس بات کا ثبوت ہے کہ لوگ ہمارے ساتھ ہیں۔

ان کا کہنا تھا کہ ’یہ الیکشن مسلح شورش پسندوں اور تمام دیگر علیحدگی پسندوں کے لئے ایک سبق ہیں، کیونکہ الیکشن سے ثابت ہوگیا کہ لوگ ہمارے ہی ساتھ ہیں۔ علیحدگی پسندوں کو اب عوام کی بہبود کے لیے قومی دھارے میں شامل ہونا چاہیے۔‘

سونیا گاندھی کی تقریرکا معنی خیز پہلو یہ تھا کہ انہوں نے پاکستان کے خلاف کوئی بات نہیں کی اور نہ ہی گزشتہ روز پاکستانی حکام کی طرف سے ممبئی سازش میں پاکستانی کردار کے اعتراف پر کچھ بولا۔ مبصرین کا کہنا ہے کہ سونیا چونکہ اپنے پچھلے دوروں کے دوران قومی سلامتی کے حوالے سے پاکستان کو خبردار کرتی رہی ہیں، لہٰذا ان کا اس بار پاکستان کا نام نہ لینا اس بات کا اشارہ ہے کہ حکومت ہند پاکستان کی طرف سے ممبئی حملوں کی تحقیات سے قدرے مطمئن ہے۔

سبق  یہ الیکشن مسلح شورش پسندوں اور تمام دیگر علیحدگی پسندوں کے لئے ایک سبق ہیں، کیونکہ الیکشن سے ثابت ہوگیا کہ لوگ ہمارے ہی ساتھ ہیں۔ علیحدگی پسندوں کو اب عوام کی بہبود کے لئے قومی دھارے میں شامل ہونا چاہیے سونیا گاندھی

اسی طرح بائیس دسمبر کو جموں کے آر ایس پورہ میں تقریر کی اور پاکستان کو خبردار کیا کہ اگر وہ ’ہمارے ملک میں خون خرابہ کرنے کی سازش میں ملوث ہوا تو اس کا منہ توڑ جواب دیا جائے گا۔‘

ریاست میں کانگریس اور نیشنل کانفرنس کی مخلوط حکومت بننے کے بعد سونیا گاندھی کا یہ پہلا دورہ تھا۔

سونیا نے سرینگر سے بارہمولہ کے لئے ریل سروس کا بھی افتتاح کیا۔ ان کے ہمراہ شہری ہوابازی کے مرکزی وزیر پرفل پٹیل اور ریلوے وزیر لالو پرساد یادو بھی تھے۔

واضح رہے سرینگر انٹرنیشنل ائیرپورٹ کا ایک ارب روپے کی لاگت سے چار سال میں تعمیر کیا گیا ہے۔ حکام کا کہنا ہے کہ یہاں ایک ساتھ ساڑھے چار سو عالمی مسافروں کے لئے سہولات کا انتظام کیا گیا ہے۔