شیو شنیکر مینن کا یہ دورہ پیر کو کا بل میں ہندوستان کے سفارت خانے پر ہوئے حملے کے پیش نظر ہورہا ہے

مسٹرشیو سنکر مینن وہاں ہندوستانی املاک کا جائزہ لیں گے۔ شیو شنکر مینن کے ساتھ وزارت خارجہ اور داخلہ کے بعض سینئر افسر بھی گئے ہیں۔ دریں اثناء کابل میں ہندوستانی سفارتخانے نے ویزا جاری کرنے کا کام پھر سے شروع کر دیا ہے۔

خارجہ سیکریٹری کابل کے دو روزہ دورے پر کابل میں حکام سے ہندوستانی مشن یعنی ہندوستانی کمپنیوں کے پروجیکٹ اور کام کرنے والے اہلکاروں کے مکمل تحفظ کی فراہمی سے متعلق مذاکرات کریں گے۔

حکومت نے خارجہ سیکریٹری کو بھیجنے کا فصیلہ وزارت خارجہ کے سیکریٹری(ویسٹ) نلن سوری کی سربراہی میں اعلیٰ سطحی ٹیم کی افغانستان سے واپسی کے بعد کیا ہے۔

سوری کو کابل میں سفارت خانے کے حملے کے فورا بعد حالات کا جائزہ لینے کے لیے بھیجا گیا تھا۔

غور طلب ہے کہ مینن کا یہ دورہ ایک ایسے وقت پر ہو رہا ہے جب ہندوستان نے دعویٰ کیا ہے کہ کابل میں اس کے سفارت خانے پر حملے کے لیے پاکستان کے خفیہ ادارے آئي ایس ائی کو ذمہ دار ٹھہرایا ہے۔

ہندوستان کے قومی سلامی کے مشیر ایم کے نارائنن نےسنیچر کو کہا تھا کہ ان کے پاس خفیہ ثبوت ہیں کہ حملہ آئی ایس آئی نے کروایا تھا۔

سات جولائي کو کابل شہر میں ہندوستانی سفارت خانے پر خود کش حملے میں دو افسر اور چار ہندوستانی سمیت چالیس سے زيادہ مقامی شہری ہلاک ہوئے تھے۔