بھارت کو توانائی کی کمی کا سامنا ہے

اس کے لیے یو پی اے کے لیڈروں کی ملاقاتوں کا دور جاری ہے اور کئی اعلی رہنماؤں نے یو پی اے کی سربراہ سونیا گاندھی سے بھی ملاقات کی ہے۔

ایک طرف جہاں یو پی اے سرکار جوہری توانائی کے عالمی ادارے آئی اے ای اے سے بات چیت کے آخری مرحلے میں حصہ لے کر بھارت کا موقف واضح کرنا چاہتی ہے وہیں اس کی اتحادی بائیں بازوں کی جماعتیں جوہری معاہدے پر مخالفت کر رہی ہیں۔

انتخابات  یہ وقت انتخابات کا نہیں۔ بائیاں محاذ اور ہم ایک ساتھ ہیں۔ پہلے مہنگائی کو ختم کرنا ہے۔ ملک کے لیے توانائی بھی بہت ضروری ہے۔ لالو پرساد یادو

بائیں محاذ نے ایک بار پھر دہرایا ہے کہ اگر حکومت آئی ای اے ای اے سے مزید بات چیت کرتی ہے تو وہ حکومت سے اپنی حمایت واپس لے لی گی۔ واضح رہے کہ جوہری معاہدے پر بات چیت کے لیے یو پی ای اور بائیں محاذ کی کمیٹی کا ایک اجلاس 25 جون کو ہونا ہے۔

اس دوران نیشنلسٹ کانگریس کے شرد پوار، راشٹریہ جنتا دل کے لالو پرساد یادو اور لوک جن شکتی کے رام ولاس پاسوان نے سونیا گاندھی سے ملاقات کی ہے۔

لالو پرساد یادو نے کہا ہے ’ یہ وقت انتخابات کا نہیں ہے، بایاں محاذ اور ہم ایک ساتھ ہیں۔ پہلے مہنگائی کو ختم کرنا ہے۔ ملک کے لیے توانائی بھی بہت ضروری ہے۔ ‘

رام ولاس پاسوان کا کہنا تھا ’سرکار نہیں گر رہی ہے۔ ایسا کوئی بھی مسئلہ نہیں ہے جس کا حل بات چیت کے ذریعے ممکن نہیں ہے۔‘

ادھر حزب اختلاف کی جماعت بھارتیہ جنتا پارٹی کے سینئر رہنما لال کرشن آڈوانی نے کہا ہے کہ ان کی پارٹی جوہری معاہدے کے حامی ہیں لیکن اس شرط پر کہ امریکہ بھارت کے نیوکلئیر ٹیسٹ کرنے پر پابندی نہ لگائے۔ ان کا یہ بھی کہنا تھا کہ اگر ان کی پارٹی اقتدار میں آتی ہے تو وہ معاہدے پر دوبارہ بات چیت کرنا چاہیں گے۔