رابرٹ گیٹس نے صدر مشرف کو ایک منتخب صدر قرار دیا

بی بی سی کو دیے گئے ایک انٹرویو کے دوران مسٹر گیٹس نے صدر مشرف کو ایک منتخب صدر بتایا اور کہا’ ہم پاکستان ميں جمہوری طریقے سے منتخب رہنماؤں کی حمایت کريں گے اور صدر اور نئے وزیر اعظم دونوں کے ساتھ مل کر کام کريں گے‘۔

پاک افغان سرحد پر شورش اور شدت پسندی کے بارے میں ایک سوال کا جواب دیتے ہوئے امریکی وزیر دفاع نے کہا کہ عراق ہو یا افغانستان یا پھر پاکستان ، شدت پسندی کے خاتمے کے لیے صرف فوج پر انحصار نہیں کیا جا سکتا۔

’مسئلہ کے حل کے لیے سیاسی ، اقتصادی اور سفارتی اقدامات کرنے کی ضرورت پڑتی ہے اور جو آپ کے مخالف ہیں انہیں اپنی طرف لانے کی کوشش کرنی ہوگی‘۔

انہوں نے کہا کہ پاکستان میں بننے والی کسی بھی نئی حکومت کو طالبان شدت پسندوں سے بات چیت کے حوالے سے محتاط رہنا چاہیے۔ ان کا کہنا تھا کہ ماضی میں اس قسم کی کوششیں بار آور ثابت نہیں ہو سکی ہیں۔

انہوں نے کہا کہ’ مشرف حکومت نے وزیرستان میں بات چیت اور معاہدوں کی کوشش کی مگر یہ کوششیں بے سود رہیں اور اب شاید پاکستان میں نئی حکومت کو اسی تجربے سے گزرنا پڑے‘۔

رابرٹ گیٹس باہمی دفاعی تعلقات کوفروغ دینے کی غرض سے ہندوستان کے دو روزہ دورے پر ہیں۔انہوں نے ہندوستان میں اپنے ہم منصب اے کے انٹونی کے علاوہ وزیر خارجہ ، وزیر اعظم اور حزب اختلاف کے رہنما سے بھی ملاقات کی ہے۔ انہوں نے کہا کہ امریکہ کے ہندوستان کے ساتھ مضبوط دفاعی تعلقات ہیں اور اسے مزید وسیع کرنے کی کوشش کی جا رہی ہے۔