سبیر بھومک، عمارہ جمالی کولکاتہ

	گزشتہ دنوں راشن کی دکانوں میں لوٹ مار اور آتشزنی کے واقعات ہوتے رہے

حزب اختلاف کی جماعتوں کا کہنا ہے کہ مارکس وادی کمیونسٹ پارٹی کے حامی نندی گرام علاقے میں تشدد پھیلائے ہوئے ہیں۔

حزب اختلاف کی اہم جماعت ترنامول کانگریس کے کارکنوں نے ہاوڑاہ برج سمیت کئی ریلوے لائنوں پر رکاوٹیں کھڑی کر دیں جن سے کولکاتا میں آنے والے ہزاروں کاروباری و ملازمین کو پریشانی کا سامنا کرنا پڑا۔

پولیس کا کہنا ہے کہ گزشتہ روز نندی گرام میں تین افراد کے ہلاک ہونے کے بعد فی الوقت ماحول کشیدہ لیکن قابو میں ہے۔ دوسری جانب ڈاکٹروں کا کہنا ہے کہ جھڑپ ميں زخمی ہونے والے پندرہ ميں سے چھ افراد کی حالت نازک ہے۔

اس سال کے اوائل پر بدھا حکومت کی جانب سے نندی گرام میں انڈونیشیا کی ایک کمپنی ’سلیم گروپ‘ سے ایک کیمیکل پلانٹ لگوانے کی کوشش کے خلاف وہاں کے عوام ’بھومی اچھید پرتیرودھ‘ (بی یو پی سی) کے تحت متحد ہوگئے تھے اور وہاں خونریز جھڑپوں اور مظاہروں کا سلسلہ شروع ہوا تھا جن میں چودہ افراد ہلاک ہو گئے تھے۔ اس کے بعد نندی گرام، جسے حکمراں سی پی ایم کا گڑھ مانا جاتا ہے، سے سی پی ایم کے کارکنوں کو بے دخل کر دیا گیا اور تب سے وہ پناہ گزین کیمپوں میں زندگی گزار رہے ہیں۔

مرکزی حکومت سے مدد کی اپیل  بدھا حکومت نے نندی گرام کی معاملے پر قابو پانے کے لیے مرکزی حکومت سے مدد کی اپیل کی ہے اور اعلان کیا کہ آئندہ ہفتے نندی گرام میں مرکزی سکیورٹی فورسز تعینات کی جائيں گی

بدھا حکومت نے نندی گرام کی معاملے پر قابو پانے کے لیے مرکزی حکومت سے مدد کی اپیل کی ہے اور اعلان کیا کہ آئندہ ہفتے نندی گرام میں مرکزی سکیورٹی فورسز تعینات کی جائيں گی۔

حزب اختلاف کی رہنما ممتا بینرجی کا کہنا ہے تھا کہ ’بدھا حکومت نندی گرام میں دہشت گردی اور خوف کا ماحول پھیلانے میں ملوث ہے اس لیے وہاں آنے والے فوجی دستوں کی کمانڈ مرکز کے ہاتھ میں ہونا چاہیے اور ریاستی حکومت کا اس پر کوئی کنٹرول نہیں ہونا چاہیے‘۔

بدھادیو سرکار جو راشن کی دکانوں ميں بدعنوانی کے معاملے اور رضوان معاملے پر پہلے ہی عوامی مخالفت میں گھری ہوئی ہے اب نندی گرام کے حالات خراب ہونے سے صورتحال مزید پیچیدہ ہو گئے ہیں۔