نادیہ پرویز بی بی سی اردو ڈاٹ کام، دلی

	سنجے دت سے ہاتھ ملانے پر ایک پولیس اہلکار معطل کر دیا گیا

راجندر کیلکر پونے شہر کی اس جیل کے (معطل) گارڈ ہیں جس میں بالی وڈ اداکار سنجے دت انیس سو ترانوے ممبئی بم دھماکوں کے مقدمے میں مجرم قرار دیے جانے کے بعد سزا کاٹ رہے تھے لیکن جب سپریم کورٹ سے سنجے دت کو عبوری ضمانت مل گئی تو وہ شاید بائیس دنوں کے درمیان بننے والے دوستوں کا شکریہ ادا کيے بنا رہ نہ سکے۔

دوستوں کا شکریہ ادا کرنے کے لیے ہاتھ ملانا اور گلے ملنے سے بہتر اور کیا ہو سکتا ہے۔ سنجے دت کا یہ رویہ شاید اس لیے بھی صحیح قرار دیا جا سکتا ہے کیوں کہ ان کی پچھلی فلم ’منّا بھائی ایم بی بی ایس‘ میں دی گئی ان کی جادو کی جپھّی بچوں اور بزرگوں سبھی میں مقبول ہوگئی تھی۔

لیکن شاید منّا بھائی کو بھی یہ اندازہ نہیں ہوگا کہ ان کی جادو کی جپھّی کسی کی نوکری بھی لے سکتی ہے۔

جب ٹی وی پر انہیں جیل کےگارڈ کی جادو کی جپھّی لیتے ہوئے دکھایا گیا تو محکمہ پولیس میں ہلچل مچ گئی۔ محکمہ پولیس کسی اہلکار کو یہ حق نہیں ہے کہ وہ ایک سزا یافتہ مجرم (سنجے دت) سے’دوستانہ‘ برتاؤ کرے۔

اور پھر وہی ہوا جس کا خدشہ محسوس کیا جا رہا تھا۔ ریاست کے نائب وزیراعلیٰ آر آر پاٹل نے جیل کے ایک گارڈ کو معطل اور پولیس کے دوسرے آٹھ جوانوں کے خلاف تحقیقات کرنے کے احکامات جاری کر دیے۔

یہ معاملہ پیر کو رونما ہوا اور منگل تک ذرائع ابلاغ ميں اس قسم کی خبريں آنے لگیں کہ وزیراعلیٰ ولاس راؤ دیش مکھ نے جیل کے گارڈ کی معطلی کا حکم واپس لے لیا ہے۔ دیگر اخبارت نے وزیراعلیٰ کے حوالے سے یہ خبر بھی شائع ہوئی کہ وزیراعلیٰ کا کہنا ہے کہ یہ کافی سخت قسم کی کارروائی ہے اور جو کچھ ٹی وی پر نظر آیا ہے اس سے یہی پتہ چلتا ہے کہ پہل سنجے دت نے کی تھی اور جیل کے گارڈ کے پاس اسی طرز پر جواب دینے کے علاوہ دوسرا کوئی راستہ نہ تھا۔

لیکن جب بی بی سی نے وزیراعلیٰ کے دفتر سے اس خبر کی تصدیق کرنے کی کوشش کی تو کہا گیا کہ ایسا کچھ نہیں ہے۔ نائب وزیر کا فیصلہ وزیراعلیٰ اکیلے کیسے منسوخ کر سکتے ہيں؟

	پونے کی جیل سے رہائی پر سنجے دت

یہاں سوال یہ اٹھتا ہےکہ اگر جیل کے اس گارڈ کی جگہ کوئی بڑا افسر ہوتا تو کیا تب بھی حکومت کا رویہ یہی ہوتا؟

جب ریاست مہاراشٹر میں سیاستدان اور پولیس کے درمیان اس قسم کی رسّہ کشی جاری تھی تو دوسری جانب ریاست جھار کھنڈ میں بھی اسی قسم کا ایک واقعہ پیش آیا۔ لیکن اس میں فرق صرف اتنا تھا کہ کوئی کارروائی نہیں کی گئی۔

جھارکھنڈ مکتی مورچہ کے رہنما شبو سورین جیل سے رہا ہو کر جب جمشید پور پہنچے تو بوکارو کے ضلع مجسٹریٹ نے ان کے پیر چھو کر ان کا استقبال کیا تھا۔

ہندوستانی سول سروسز کے ضابطوں کے مطابق سول سرونٹ پوری طرح غیر جانب دار ہوتا ہے اور اسے کوئی ایسا برتاؤ نہیں کرنا چاہیے جس سے اس کی کسی مخصوص شخص رہنما یا دیگر افراد سے وابستگی یا قربت ظاہر ہو۔

شبو سورین پر اپنے ایک سکریٹری کے قتل میں ملوث ہونے کا الزام تھا۔ ذیلی عدالت نے شبو سورین کو اس مقدمے میں عمر قید کی سزا سنائی لیکن ہائی کورٹ نے نا کافی ثبوت کی بنیاد پر انہیں بری کر دیا۔

بی بی سی نے جھارکھنڈ کے وزیراعلیٰ مدھو کوڑے سے جب اس بارے ميں پوچھا تو ان کا کہنا تھا کہ وہ اسے غلط نہيں سمجھتے ہيں۔

ان کا کہنا تھا کہ شبو سورین نے جھارکھنڈ کو ایک الگ ریاست بنانے میں کافی اہم کردار ادا کیا ہے اور ان کے لیے کسی کے بھی دل میں احترام پیدا ہو سکتا ہے۔

ان واقعات سے ایک بات کا اشارہ ملتا ہے ہندوستان میں بعض سیاستداں یہ تاثر دیتے ہیں کہ ملک کا قانون طبقاتی ہے یعنی ایک طبقے کے لیے اور دوسرے کے لیے کچھ اور۔