ریحانہ بستی والا بی بی سی اردو ڈاٹ کام ، ممبئی

	جس روز سے سنجے دت کی اپیل عدالت میں داخل ہوئی ہے تب سے دیگر سزایافتہ لوگوں کے رشتہ داروں نے عدالت کے باہر مظاہرے شروع کر دیے ہيں

عدالت کے سامنے درجنوں سزایافتہ قیدیوں نے اپیلیں کی ہیں جن میں کہا گیا ہے کہ ایک ہی عدالت میں ایک مجرم کے ساتھ نرمی اور دوسروں کے ساتھ سختی کیوں برتی جا رہی ہے۔

جس روز سے سنجے دت کی اپیل عدالت میں داخل ہوئی ہے تب سے دیگر سزایافتہ لوگوں کے رشتہ داروں نے عدالت کے باہر مظاہرے شروع کر دیے ہيں اور انصاف کا مطالبہ کر رہے ہیں۔ ان کا کہنا ہے کہ جس طرح سنجے دت پر سے ٹاڈا ہٹا دیا گیا اور انہیں صرف اسلحہ قانون کا مجرم قرار دیا گیا اسی طرح دیگر مجرمین کے مقدموں پر بھی نظر ثانی کیا جانا چاہیے۔

بم دھماکوں کے مقدمے کے 68 مجرمین اس وقت آرتھر روڈ جیل میں قید ہیں۔ انہوں نے ٹاڈا عدالت میں ایک اپیل داخل کی ہے۔ مجرم ذاکر حسین منا عرف منوج کمار گپتا، آصف شیخ، شاہنواز شیخ کے علاوہ دیگر نے عدالت کے سامنے اپیل کی ہے جسے عدالت نے سماعت کے لیے منظور کر لیا ہے اور اس پر سماعت بارہ مارچ کو ہوگی۔

چھبیس صفحات پر مشتمل اس اپیل میں کہا گیا ہے کہ وہ پیشہ ور مجرم نہیں ہیں۔ بابری مسجد کے انہدام، اس کے بعد پولیس کا جانب دارانہ رویہ، فسادات کے دوران مسلمانوں پر ہونے والے مظالم نے انہیں ان دھماکوں کا حصہ بننے پر مجبور کیا تھا لیکن ان میں سے بیش تر کا یہ دعوی ہے کہ انہیں پتہ نہیں تھا کہ آخر کیا ہونے والا ہے، کیونکہ وہ کسی سازش کا حصہ نہیں تھے۔

عرضی میں کہا گیا ہے کہ عدالت انہیں ٹاڈا کے تحت الزامات سے بری کرے اور انہیں بغیر کسی شرط کے ذاتی مچلکہ پر رہا کیا جائے۔ درخواست گزاروں کا کہنا ہے کہ عدالت ان کے مقدموں پر نظر ثانی کے لیے ایک کمیٹی مقرر کرے جو دو ہفتوں کے اندر رپورٹ پیش کر دے۔

سنجے دت کے وکیل کی اپیل  سٹار دت کے وکیلوں نے عدالت سے کہا ہے کہ ان کا موکل کوئی عادی مجرم نہیں ہے اور اسی لیے انہیں سزا کے بجائے رہا کیا جائے اور ان کے اخلاق کو پرکھنے کے لیے ایک پروبیشن افسر مقرر کیا جائے

اس سے قبل 69 مجرمین نے اسی طرح کی عرضی عدالت میں داخل کی تھی۔

سینئر ایڈوکیٹ عباس کاظمی کا کہنا تھاکہ یہ عدالت پر منحصر ہے کہ وہ ان عرضیوں کو کتنی اہمیت دیتی ہے لیکن اگر عدالت نے ان پر ایک بار پھر بحث کی اجازت دے دی تو فیصلے کا رخ مڑ سکتا ہے۔

دت کا کیس
فلم سٹار سنجے دت کے لیے ان کے وکیل وی آر منوہر اور ستیش مانے شندے نے عدالت میں کہا تھا کہ ان کا موکل کوئی عادی مجرم نہیں ہے اور اسی لیے انہیں سزا کے بجائے رہا کر دیا جائے اور ان کے اخلاق کو پرکھنے کے لیے ایک پروبیشن افسر مقرر کیا جائے۔

دت کی اس اپیل کے بعد ان کے دوست اور فلمساز سمیر ہنگورا، بابا موسی چوہان جنہوں نے ان کے گھر اسلحہ پہنچایا عدالت سے کہا کہ ان کی سزا کے تعین پر ان کے وکلاء اس وقت بحث کریں گے جب وہ دت کے وکلاء کی بحث سن لیں۔

لیکن عدالت نے اس پر ہفتوں دونوں فریقین کے وکلاء کی بحث سننے کے بعد اپنا فیصلہ محفوظ رکھا اور یہ بھی کہا کہ سنجے دت کے بارے میں فیصلہ تمام ملزموں کو سزا کی مدت سنانے کے بعد دیا جائے گا۔

اب سب کو بارہ مارچ کا شدت کے ساتھ انتظار ہے اور یہی وہ دن ہے جب چودہ سال قبل ممبئی سلسلہ وار بم دھماکوں سے لرز گیا تھا۔

	بم دھماکوں کے مقدمے کے 68 مجرمین اس وقت آرتھر روڈ جیل میں قید ہیں

آٹھ پولیس اہلکار اس کیس کے ملزم تھے جن میں سے پانچ کو مجرم قرار دیا گیا۔ اسی طرح کسٹم کے تمام پانچ کسٹم افسران کو عدالت نے مجرم گردانا ہے۔ اس وقت نوے قیدی جیل میں ہیں اور دس ضمانت پر رہا ہیں۔