جنوبی ایشیا میں بارش اور سیلاب سے بڑے پیمانے پر تباہی پھیلی ہے

لاپتہ افراد کے بارے میں خیال کیا جا رہا ہے کہ وہ بھی تودے کے نیچے دب کر ہلاک ہو گئے ہیں۔دھارلا نامی گاؤں پر مٹی کا تودہ گرنے سے پورا گاؤں میں دفن ہو گیا ہے۔ ملبے تلے دبے افراد کو نکالنے کے لیے فوج کو طلب کر لیا گیا ہے۔

دھارلا گاؤں میں پولیس کے ایک افسر نے خبر رساں ادارے رائٹرز کو بتایا کہ انہیں تودے کے نیچے دفن ہوجانے والےگاؤں کے ملبے سے کسی فرد کے زندہ نکلنے کی امید نہیں ہے۔ انہوں نے بتایا کہ گاؤں میں واقع چودہ مکانات اور ایک ہیلتھ کیئر سینٹر مٹی اور پتھروں کے نیچے دفن ہوگئے ہیں۔

ہندوستان کی ریاست ہماچل پردیش میں گزشتہ کئی دنوں سے ریکارڈ بارشوں کا سلسلہ جاری ہے جس میں اطلاعات کے مطابق اب تک چالیس افراد ہلاک ہو چکے ہیں۔

	جنوبی ایشیا میں سیلاب کے باعث لاکھوں افراد بے گھر ہو چکے ہیں

دوسری طرف بنگلہ دیش میں حکام کا کہنا ہے کہ اس سال مون سون کے موسم میں کم از کم پانچ سو افراد ہلاک ہو چکے ہیں جس میں منگل کی رات 38 افراد کی ہلاکت ہوئی ہے۔

جولائی کے آخر میں سیلابی صورت حال کے بعد کوئی ایک لاکھ دس ہزار افراد کو پانی سے پیدا ہونے والی بیماریوں جیسے اسہال وغیرہ کے باعث ہسپتالوں میں داخل کیا گیا ہے۔ ڈھاکہ میں مختلف بیماریوں کے تدارک کے لیے حکومت نے موبائل طبی ٹیمیں متاثرہ علاقوں کی طرف روانہ کی ہیں، ڈاکٹروں کی چھٹیاں منسوخ کردی گئی ہیں اور اسہال کے مریضوں کے علاج کے لیے ایک عارضی ہسپتال بھی قائم کیا گیا ہے۔

ایک سینئر ہیلتھ افسر عائشہ خاتون نے بتایا کہ دست اور قے کے مریضوں کی صورت حال بہت خراب ہے۔ ہسپتال میں ہر روز مریضوں کا رش رہتا ہے۔

	سیلاب سے متاثرہ علاقوں میں پانی سے پیدا ہونے والی بیماریاں تیزی سے پھیل رہی ہیں

ڈاکٹر اشعار الاسلام خان نے بتایا: ہمیں خدشہ ہے کہ موجودہ صورت حال کی وجہ سے مریضوں کی تعداد میں مزید اضافہ ہو گا‘۔

جیسے جیسے سیلابی پانی اتر رہا ہے ویسے ویسے ریلیف کیمپوں سے لوگوں کی اپنے گھروں کو واپسی شروع ہو گئی ہے تاہم ان کے ہمراہ پینے کا پانی اور کھانے پینے کی اشیا کی انتہائی قلیل تعداد ہے۔

اقوام متحدہ کا امدادی ادارہ بھارت، نیپال اور بنگلہ دیش میں سیلاب سے متاثرہ علاقوں میں کھانے پینے کی اشیا، پانی کی بوتلیں اور مچھر دانیاں تقسیم کر رہا ہے۔ بھارت کی ریاستیں بہار اور اتر پردیش سیلاب اور بارشوں سے سب سے زیادہ متاثر ہوئی ہیں۔