شکیل اختر بی بی سی اردو ڈاٹ کام، دلی

	ابھی تک مذکورہ ویڈیو کے اصل ہونے کی تصدیق نہیں ہو سکی ہے

ایک گھنٹے سے زائد دورانیے کی اس ویڈیو میں ایک نامعلوم شخص کوایک بیان پڑھتے ہوئے دکھایا گيا ہے، جس میں کہا گيا ہے:’امریکہ کے ساتھ ساتھ تل ابیب، ماسکو اور دلی کو بھی نشانہ بنانا ہمارا جائز حق ہے‘۔

اس بیان میں یہ الزام لگایا گیا ہے کہ:’ہندوستان نے ایک لاکھ سے زیادہ کشمیری مسلمانوں کو قتل کیا ہے۔ ہندوستان نے ایک لاکھ سے زائد مسلمانوں کا یہ قتل عام امریکہ کی حمایت سے کیا ہے‘۔

ابھی تک اس ویڈیو کے اصل ہونے کی تصدیق نہیں ہو سکی ہے۔

داخلی امور کے وزیر مملکت شری پرکاش جیسوال نے کہا ہے کہ ابھی تک ان کی وزارت کو القاعدہ سے کسی دھمکی کی کوئی مصدقہ اطلاع نہیں ملی ہے۔ تاہم انہوں نے کہا:’ ہندوستان کسی بھی طرح کے خطرے کا مقابلہ کرنے کے لیے ہر وقت تیار ہے‘۔

القاعدہ کی جانب سے حملے کی مبینہ دھمکی ایک ایسے وقت میں سامنے آئی ہے جب چند دن بعد ہندوستان اپنی آزادی کا ساٹھ سالہ جشن منانے کی تیاریاں کر رہا ہے۔

اطلاعات کے مطابق ہندوستان دنیا کے اہم دارالحکومتوں میں اپنے سفارتخانوں کی سلامتی کے اقدامات کو مزید سخت کر رہا ہے۔

قومی سلامتی کے مشیر ایم کے نارائنن نے ایک ٹی وی انٹرویو میں القاعدہ کی سرگرمیوں پر تشویش ظاہر کی ہے۔ انہوں نے یہ بھی کہا کہ ماضی میں القاعدہ کے غیر ملکی کارکن ہندوستان میں بعض نشانوں کا جائزہ لینے آئے تھے لیکن ان کا مشن کامیاب نہیں ہو سکا تھا۔

واضح رہے کہ امریکہ اور اسرائیل ماضی میں بھی ہندوستان کو القاعدہ کے کسی ممکنہ حملے کے بارے میں خبردار کر چکے ہیں۔