سہراب الدین کو نومبر دو ہزار پانچ میں ہلاک کیا گیا تھا

سی آئی ڈی پولیس افسر گیتا جوہری نے سہراب الدین کی ہلاکت کے واقعے کی مفصل تفتیش کے بعد احمدآباد کی ایک ذیلی عدالت میں فرد جرم داخل کی ہے۔

جن افسران پر فردِ جرم عائد کی گئی ہے ان میں سے نو کا تعلق گجرات اور چار کا راجستھان سے ہے۔گیتا جوہری کے مطابق انہیں اپنی تفتیش میں فرضی تصادم کے اس واقعہ میں کسی سرکاری رہنما کے ملوث ہونے کا ثبوت نہیں ملا۔

سہراب الدین کو نومبر دو ہزار پانچ میں گجرات اور راجستھان پولیس کے تین اعلیٰ افسران نے لشکرِ طیبہ کا دہشت گرد بتا کر ایک فرضی تصادم میں ہلاک کر دیا تھا۔اور پولیس نے یہ بھی بتایا تھاکہ سہراب الدین وزیرِاعلٰی نریندر مودی کے قتل کرنے کے مشن پر تھا۔ اس آپریشن کی قیادت ڈی جی ونجارہ نے کی تھی۔

سی آئی ڈی نے تمام متعلقہ پولیس افسروں کے بیانات ویڈیو ٹیپ کیے تھے اور اس معاملے میں تین پولیس افسران ڈی آئی جی ڈی جی ونجارہ، پانڈین اور الور کے سپرٹینڈینٹ ایم این دنیش کمار کو گرفتار کیا گیا تھا اور انہیں بعد ازاں معطل بھی کر دیا گیا تھا۔

سہراب الدین کے بھائی نے سپریم کورٹ میں ایک عرضی داخل کی تھی جس میں اس معاملے کی تحقیقات کرانے کا مطالبہ کیا تھا۔ تفتیش کے دوران سہراب الدین کی بیوی کوثر بی اور سہراب کے ایک دوست تلسی پرجاپتی کے قتل کا پتہ چلا تھا لیکن بظاہر ان واقعات میں کوئي پیش رفت نہيں ہوئي ہے۔