ریحانہ بستی والا بی بی سی اردو ڈاٹ کام، ممبئی

	جعلی مقابلے کے بعد پولیس افسران کا کہنا تھا عشرت جہاں اور اس کے ساتھی اسلامی شدت پسند تنظیم لشکر طیبہ سے تعلق رکھتے تھے

ملزمان، پولیس افسر ڈی جی ونزاراہ، راج کمار پنڈیہ اور دنیش کمار کو چوبیس اپریل کو گرفتار کیا گیا تھا۔ ان پر سہراب الدین کو جعلی پولیس مقابلے یا فیک انکاؤنٹر میں مارنے اور پھر ان کی بیوی کو قتل کرنے کا الزام ہے۔

اس معاملے کی تحقیقات کرنے والی ایجنسی سی آئی ڈی نے عدالت سے ان افسران کا نارکوانالیسس کرانے کی بھی درخواست کی ہے۔

سی آئی ڈی نے عدالت سے کہا تھا کہ فرضی تصادم میں مارے گئے سہراب الدین کی بیوی کوثر بی کی ہلاکت کے بارے میں تفصیلی تحقیقات کے لیے ان تینوں پولیس افسران کو کم سے کم سات دن کے لیے مزید پولیس تحویل میں دیا جائے لیکن عدالت نے اس کے لیے صرف تین دن کا وقت دیا ہے۔

پیشی کے وقت عدالت کے احاطے میں لوگوں کی بڑی تعداد جمع تھی اور ایک بار پھر ڈی جی ونزاراہ کے حق میں نعرہ بازی کی گئی۔ کورٹ میں ونزاراہ کے گھر کے لوگ بھی موجود تھے۔ اس معاملے کی اگلی سماعت آٹھ مئی کو ہوگی۔

	عشرت جہاں کی بیوہ والدہ شمیمہ اپنی چار بیٹوں اور دو بیٹوں کے ساتھ

سی آئی ڈي کو اس معاملے کی حتمی رپورٹ پندرہ مئی کو سپریم کورٹ کو پیش کرنی ہے۔ اگر سپریم کورٹ سی آئی ڈی کی رپورٹ سے مطمئن نہ ہوئی تو یہ معاملہ مرکزی تفتیشی ادارے سی بی آئی کے حوالے کیا جا سکتا ہے۔

سہراب الدین کے اہل خانہ اور مرکزی حکومت پہلے ہی سپریم کورٹ سے اپیل کر چکے ہیں دریں اثنا ایک اور پولیس مقابلے میں ہلاک ہونے والی عشرت جہاں کی والدہ نے کہا ہے کہ وہ بھی اپنی بیٹی کی ہلاکت کے تحقیقات سی بی آئی سے کرانے کے لیے ممبئی ہائی کورٹ سے درخواست کر رہی ہیں۔

اسی دوران سپریم کورٹ کے دو وکلاء نتیہ راما کرشنن اور بی جی ورگز نے ریاست گجرات میں ہونے والے اکیس پولیس مقابلوں کی تحقیقات کے لیے مفاد عامہ کی اپیل دائر کی ہے جس میں وہ عشرت جہاں کا کیس بھی شامل کریں گے۔

عشرت جہاں سمیت تین افراد کو احمدآباد کی خصوصی پولیس ٹیم نے پندرہ جون سن دو ہزار چار کو مبینہ جعلی پولیس مقابلے میں ہلاک کیا تھا اور ملزم ونزارا جو اس وقت احمدآباد کرائم برانچ کی خصوصی برانچ کے ڈپٹی پولیس کمشنر تھے اور وہ پولیس مقابلہ کرنے والی ٹیم کے سربراہ بھی تھے۔

اب ملزم سابق ڈی آئی جی ونزارا پولیس حراست میں ہیں۔ ان پر سہراب الدین کے جعلی پولیس مقابلے کا الزام ہے۔ ونزارا پر سہراب الدین کی بیوی کوثر بی اور اس معاملے کے ایک اہم گواہ تلسی پرجا پتی کے بھی قتل کا الزام ہے۔

عشرت جہاں اور اس کے ساتھ تین افراد کی جعلی پولیس مقابلے میں ہلاکت کے بعد ونزارا نے پریس میں کہا تھا کہ عشرت جہاں اور اس کے ساتھی اسلامی شدت پسند تنظیم لشکر طیبہ کے رکن تھے اور وہ گجرات کے وزیر اعلی نریندر مودی، آّر ایس ایس لیڈر پروین توگڑیا اور لال کرشن ایڈوانی کے قتل کے ارادے سے آئے تھے۔

	خالصہ کالج جہاں عشرت جہاں زیر تعلیم تھی

عشرت کی والدہ بیوہ ہیں۔ ان کی چار بیٹیاں اور دو بیٹے ہیں۔ سب کی تعلیم ادھوری رہ گئی کیونکہ کوئی ذریعہ معاش نہیں ہے۔ انتہائی کسمپرسی کی زندگی گزارتا یہ خاندان اب عدالت جانے کے لیے تیار ہے۔

عشرت کی چھوٹی بہن مسرت جہاں نے پولیس کی زیادتیوں کا ذکر کرتے ہوئے کہا ’پولیس نے ان کی گھر کی مکمل تلاشی لی۔ میری بہن کی کتابیں اور تصاویر سب کچھ وہ اپنے ساتھ لے گئے،گھر سے جب کچھ نہیں ملا تو پولیس ہمیں تھانے لے آئی جہاں رات ڈیڑھ بجے تک پولیس سٹیشن میں رکھا گیا۔ حد تو یہ ہے کہ میرے سات سالہ بھائی امان اللہ تک کا بیان قلمبند کیا گیا تھا‘۔

عشرت ممبئی کے خالصہ کالج میں بی ایس سی کی دوسرے سال کی طالبہ تھی۔ خالصہ کالج کے پرنسپل اجیت سنگھ عشرت کی والدہ کے فیصلے سے خوش ہیں۔

انہوں نے بی بی سے سے بات کرتے ہوئے کہا ’سچائی کو دنیا کے سامنے آنا چاہیے‘۔ عشرت کے بارے میں انہوں نے اور ان کے کالج کے لیکچرار اور طالبات نے پہلے بھی کہا تھا کہ وہ ایک اچھی ذہین طالبہ تھی۔ ’مجھے یقین ہے کہ جس طرح دہلی میں جیسیکا لال قتل کیس کے ملزمان آخر کار پولیس حراست میں ہیں اسی طرح اس کیس میں بھی عدالت صحیح فیصلہ کرے گی‘۔

’کمیونلزم کومبیٹ‘ نامی جریدے کے ایڈیٹر اور انسانی حقوق کے سرگرم کارکن جاوید آنند نےگجرات حکومت اور چند مخصوص پولیس اہلکاروں پر شدید تنقید کرتے ہوئے کہا ’سہراب الدین کے جعلی پولیس مقابلے نے ونزارا کے ہر پولیس مقابلے پر سوالیہ نشان لگا دیا ہے۔ اس لیے ہم یہ بات کہہ سکتے ہیں کہ عشرت جہاں کا بھی انکاؤنٹر غلط ہو سکتا ہے‘۔

	مقتولہ عشرت جہاں کی والدہ شمیمہ جو چاہتی ہیں کہ ان کی بیٹی کی ہلاکت کی تحقیقات سی بی آئی سے کرائی جائیں

تھانے یونٹ ون کے ڈپٹی پولیس کمشنر مدھوکر پانڈے نے عشرت جہاں انکاؤنٹر کے بارے میں بی بی سی کو بتایا کہ ممبرا پولیس نے عشرت کے خلاف کوئی کیس درج نہیں کیا تھا البتہ اس کے انکاؤنٹر کے بعد پولیس نے اس کے گھر کی صرف تلاشی لی تھی۔ ان کے گھر کے لوگوں کے بیانات ریکارڈ کیے تھے جسے انہوں نے احمدآباد پولیس کے حوالے کر دیا تھا۔