 | | | تاج محل کو مغل فن تعمیر کی بہترین نشانی سمجھا جاتا ہے |
ایک بین الاقوامی مقابلے کے ذریعے طے پانے والے دورِ جدید کے سات عجائبات میں آگرہ کے تاج محل کو بھی شامل کرلیا گیا ہے۔ پرتگال کے دارالحکومت لِزبن میں ایک تقریب کے دوران ہالی وُڈ کے معروف اداکار بین کِنگسلے اور بالی وُڈ کی اداکارہ بپاشا باسو نے دورِ جدید کے سات عجائبات کے ناموں کا اعلان کیا۔ تاج محل کا نام تقریب کے سب سے آخر میں اعلان ہوا اور آگرہ کی میئر انجولا سنگھ نے ہندوستان کی جانب سے اس کا سرٹیفیکٹ حاصل کیا۔ تاج محل کی تعمیر سترہویں صدی میں مغل بادشاہ شاہ جہاں نے اپنی بیگم ممتاز محل کی یاد میں کروائی تھی۔ عمارت کے زمیں دوز حصے میں ممتاز محل کی قبر واقع ہے جبکہ شاہ جہاں کی قبر بھی ممتاز محل کی قبر کے نزدیک ہی ہے۔ عجائبات ِعالم کی اب تک کی فہرست دو ہزار برس قبل بنائی گئی تھی اور اب ایک سوئس تنظیم’نیو سیون ونڈرز فاؤنڈیشن‘ نے نئے عجائبات کے انتخاب کے لیے آن لائن اور بذریعہ موبائل ووٹنگ کرائی تھی۔ اس مقابلے میں منتخب کیے جانے والے دورِ جدید کے چھ دیگر عجائبات حسب ذیل ہیں: پیرو میں اِنکا تہذیب کا مندر ماچو پیچو، دیوارِ چین ، میکسیکو میں چی چین اِتزا کا ہرم، روم کا کلوسیئم، برازیل میں یسوع مسیح کا مجسمہ اور اردن میں پیٹرا کے آثار۔ برطانوی مؤرخ مائیکل وُڈ نے سنگ مرمر سے بنائے گئے تاج محل کے حسن پر تبصرہ کرتے ہوئے کہا کہ آپ کو اس کا رنگ دن کے ڈھلنے کے ساتھ بدلتا ہوا دکھائی دیتا ہے جو اسے مزید پرکشش بنا دیتا ہے۔ نیو سیون ونڈرز فاؤنڈیشن نے کہا ہے کہ دورِ جدید کے نئے سات عجائبات کے انتخاب کے لیے کرائے جانے والے بین الاقوامی مقابلے میں ایک سو ملین لوگوں نے انٹرنیٹ، ٹیلی فون اور ایس ایم ایس کے ذریعے ووٹنگ کی۔ | 
’آئین مذہبی آزادی کو تحفظ دیتا ہے‘
