سنیل رمن بی بی سی نیوز، دلی

	ایسا لگتا ہے کہ تاج محل پہلے دس مقامات میں ہی شامل ہو سکےگا

تاج محل ان اکیس مقامات و عمارات میں سے ایک ہے جنہیں گزشتہ برس نئے عجائباتِ عالم کے انتخاب کے لیے ایک عالمی پول میں منتخب کیا گیا تھا۔

عجائبات ِعالم کی حالیہ فہرست دو ہزار برس قبل بنائی گئی تھی اور اب ایک سوئس تنظیم’ نیو سیون ونڈرز فاؤنڈیشن‘ نئے عجائبات کے انتخاب کے لیے آن لائن اور بذریعہ موبائل ووٹنگ کروا رہی ہے۔ اس ووٹنگ کے نتائج کا اعلان سات جولائی کو کیا جائے گا۔

ایک جانب جہاں برازیل کے صدر نے ریڈیو پر عوام کو ریوڈی جنیرو میں واقع مسیح کے مجسمے کو عجائبات میں شامل کروانے کے لیے ووٹنگ کا طریقۂ کار بتایا ہے اور پیرو کی حکومت نے اپنے قدیم شہر ماچو پیچو کو اس فہرست میں شامل کروانے کے لیے عوامی مقامات پر کمپیوٹر ٹرمینلز لگائے ہیں تاکہ عوام آن لائن ووٹ کر سکیں۔ وہیں انڈیا میں جہاں ایک ارب کی آبادی میں ہر پچاسواں شخص کمپیوٹر صارف اور ایک سو ستر ملین موبائل فون صارف ہیں، اس حوالے سے خاص جوش و جذبہ دکھائی نہیں دے رہا اور حالیہ ووٹنگ سے ایسا لگتا ہے کہ تاج محل پہلے دس مقامات میں ہی شامل ہو سکےگا۔

اس وقت چند نجی ٹی وی چینل عوام سے تاج محل کے لیے ووٹنگ کی اپیل کر رہے ہیں اور موسیقار اے آر رحمان نے بھی اس حوالے سے ایک نغمہ ترتیب دیا ہے لیکن شاید اب دیر ہو چکی ہے۔

ووٹنگ مہم چلانے والے ایک گروپ کے سربراہ بھارت کپاڈیا کا کہنا ہے ’ہمیں بہت زیادہ ووٹ درکار ہیں۔ یہ بہت افسوسناک بات ہے کہ حکومت اس حوالے سے کچھ نہیں کر رہی۔ ہم وزارتِ سیاحت سے بات کر رہے ہیں اور ان کا صرف یہی کہنا ہے کہ یہ ایک اچھا منصوبہ ہے‘۔ اس حوالے سے بھارتی وزارتِ سیاحت کی اہم افسر لیلا نندن کا کہنا ہے کہ’ یہ بھارتی عوام کی ذمہ داری ہے اور انہیں اسے نبھانا چاہیے‘۔