ریاض مسرور بی بی سی اردو ڈاٹ کام، سرینگر

	’فیلگ میٹنگ کے بعد لڑکی کو واپس بھیج دیا گیا‘

پونچھ میں تعینات جموں و کشمیر پولیس کے اے ایس پی ظاہر بٹ نے بی بی سی کو بتایا کہ گزشتہ روز پاکستانی زیرِ انتظام کشمیر کی رہنے والی بیس سالہ دوشیزہ انیدا خان والدین کی جانب سے طے شدہ رشتہ ٹھکرا کر کنٹرول لائن پار کر کے ہندوستان کے زیر کنٹرول علاقہ پونچھ میں داخل ہوگئی تھی۔

ظاہر بٹ کا کہنا ہے کہ ’مقامی فوجی یونٹ نے سول آبادی کی مدد سے لڑکی سے پوچھ گچھ کی اور بعد میں جب حقیقت معلوم ہوئی تو پاکستانی رنیجرز کے ساتھ فیلگ میٹنگ کے بعد لڑکی کو واپس بھیج دیا گیا‘۔

پونچھ میں فوج کے ایک ترجمان نے بتایا کہ انیدا نے پونچھ سیکٹر میں کرشنا گھاٹی کے قریب کنٹرول لائن پار کی تھی اور چار سو میٹر تک ہندوستانی علاقہ عبور کر لیا تھا۔

ترجمان کے مطابق انیدا کو پہلے گرفتار کر لیا گیا اور بعد میں مقامی لوگوں کے تعاون سے اسے سُناری گلی علاقہ میں پہنچایا گیا جہاں مزید پوچھ گچھ کی گئی۔

فوجی ترجمان کے مطابق پونچھ میں کنٹرول لائن پر پچھلے سال قائم کی گئی راہداری روشنی پوسٹ پر ہندوستان کے فوجی و سول حکام نے انیدا کو پاکستانی حکام کے حوالے کر دیا۔

واضح رہے کہ سنہ دو ہزار پانچ میں تباہ کن زلزلہ کے بعد حکومت ہند نے پونچھ میں کنٹرول لائن پر چکاں دا باغ اور کرشنا گھاٹی پر دو رابطہ مقامات کھولنے کا اعلان کیا تھا۔