صلاح الدین بی بی سی اردو ڈاٹ کام، دلی

	پرتیبھا پاٹل ریاست راجستھان کی گورنر ہیں

دلی میں صحافیوں سے بات چیت میں انہوں نے کہا کہ ملک کے سب سے اعلیٰ عہدے کے لیے ایک خاتوں کو نامزد کرنے سے یہ پتہ چلتا ہے کہ ہندوستان میں خواتین کی عزت ہوتی ہے۔

انہوں نے کہا: ’سب سے اعلی عہدے پر میری نامزدگی خواتین کے لیے ایک بڑا قدم ہے اور یو پی اے کی امیدوار کی حیثیت سے میں بہت خوش ہوں۔ اس سے اندازہ ہوتا ہے کہ بھارت میں خواتین کو کس قدر عزت بخشی جاتی ہے۔‘ ان کا کہنا تھا کہ اس سے خواتین کی حوصلہ افزائی ہوگي۔

ان سے جب پارلیمنٹ میں خواتین کے لیے ریزرویشن بل کے متعلق سوال کیا گيا تو ان کا کہنا تھا کہ اس مسئلے پر پارلیمنٹ کو ہی فیصلہ کرنا ہے۔

محترمہ گاندھی کا شکریہ ادا کرنے کے بعد پرتیبھا پاٹل وزیراعظم منموہن سنگھ کی رہائش گاہ پہنچیں جہاں کانگریس کے کئی سینیئر رہنماؤں کی موجودگی میں ایک میٹنگ ہوئی ہے۔ انہوں نے کہا ہے کہ پہلے وہ گورنر کے عہدے سے مستعفی ہوں گی پھر صدر کے لیے کاغذات نامزدگی بھریں گی۔

اسی دوران حزب مخالف محاذ این ڈی اے کی سرگرمیاں بھی تیز ہوگئی ہیں۔ بھارتیہ جنتا پارٹی نے پہلے کہہ دیا ہے کہ وہ پرتیبھا پاٹل کی حمایت نہیں کرے گي۔ تیسرے محاذ نے بھی اس بارے میں اٹھارہ تاریخ کو ایک میٹنگ طلب کی ہے جس میں یہ فیصلہ کیا جائےگا کہ ان کی طرف سے کوئی امید وار کھڑا ہوگا یا پھر کانگریس اور بی جے میں سے وہ کسی ایک امید وار کی حمایت کریں گے۔

امکان ہے کی موجودہ نائب صدر بھیرو سنگھ شیخاوت ایک آزاد امید وار کی حیثیت صدارتی امید وار ہوں گے اور بی جے پی اور اس کی اتحادی جماعتیں ان کی حمایت کریں گي۔

دریں اثناء سنیچر کو الیکشن کمیشن نے صدارتی انتخاب کے لیے نوٹیفیکیشن بھی جاری کردیا ہے جس کے ساتھ پرچۂ نامزدگی کا عمل شروع ہوگیا ہے۔ کاغذات نامزدگي کی آخری تاریخ تیس جون ہے۔

اگر کسی ایک امید پر اتفاق رائے نہیں ہوسکا تو ووٹنگ انیس جولائی کو ہوگی اور اکیس جولائی کو اس کی گنتی کی جائےگي۔ موجودہ صدر اے پی جے عبدالکلام کی میعاد چوبیس جولائی کو ختم ہو رہی ہے۔