رشتوں میں بہتری لانے کا جذبہ متاثر نہیں ہو سکتا: کلام

صدر جمہوریہ نے یہ بات پارلیمان کے بجٹ اجلاس کے افتتاح میں دونوں ایوانوں سے خطاب کرتے ہوئے کہی۔ ہندوستان کی پارلیمان میں جمعہ سے بجٹ اجلاس شروع ہوا ہے۔ اس اجلاس میں عام بجٹ اور ریلوے بجٹ پیش کیا جائے گا۔

صدرجمہوریہ نے سمجھوتہ ایکسپریس دھماکے پر دکھ کا اظہار کرتے ہوئے کہا کہ حکومت ان چیلنجز سے سختی سے نمٹے گی۔

انہوں نے امید ظاہر کی ہے کہ ایسے واقعات کے سبب بھارت پاکستان کے درمیان جاری امن مذاکرات متاثر نہیں ہوں گے۔

ان کا کہنا تھا ’ہم اس افسوسناک واقعہ کو دونوں ملکوں کے درمیان بہتر رشتے قائم کرنے کے جذبے کے درمیان نہیں آنے دیں گے‘۔

صدر کلام نے کہا کہ ملک کی خفیہ ایجنسیوں اور سکیورٹی اہلکاروں نے دہشت گردی کے کئی منصوبوں کو ناکام بنایا ہے لیکن ممبئی، آسام اور اب حال ہی میں سمجھوتہ ایکسپریس پر حملے جیسے افسوسناک اور بزدلانہ واقعات بھی سامنے آئے ہیں۔

ان کا کہنا تھا کہ حکومت جموں و کشمیر اور شمال مشرقی ریاستوں کے افراد کی تکلیفوں اور پریشانیوں کو دور کرنے کی کوشش کرے گی اور ساتھ ہی ’دہشت گرد‘ قوتوں پر نظر رکھے گی۔

ان کا کہنا تھا کہ حکومت اس بات کو سب سے زیادہ ترجیح دیتی ہے کہ سبھی خفیہ ایجنسیاں مشکل سے مشکل حالات میں بھی بنیادی انسانی حقوق کا خیال رکھیں۔

انھوں نے ملک میں بڑھتی ہوئی مہنگائی پر بھی تشویش ظاہر کی اور کہا کہ حکومت ایسے اقدامات کرے گی کہ غریب طبقوں کو مہنگائی کا بوجھ نہ اٹھانا پڑے۔