دونوں ریاستوں میں پانی کی تقسیم پرگذشتہ ایک صدری سے تنازعہ جاری ہے۔

دریائےکاویری کے پانی سے متعلق یہ فیصلہ پیر کو دلی میں ایک ٹرائبیونل کی جانب سے دیا جائے گا۔

دریائےکاویری ریاست کرناٹک اور تمل ناڈو کے درمیان بہتا ہے اوردونوں ریاستوں میں پانی کی تقسیم پرگذشتہ ایک صدری سے تنازعہ جاری ہے۔

اس سے قبل 1991 میں دلی میں واقع ’ کاویری واٹر ڈسپیوٹ ٹرائبیونل‘ نے یہ حکم دیا تھا کہ کرناٹک دریائے کاویری کے پانی کا ایک طےشدہ حصہ تمل ناڈو کوفراہم کرے گا۔

لیکن اس حکم کےبعد کرناٹک اور تمل ناڈو کے عوام کے درمیان تشدد بھڑک اٹھا۔ اس تشدد میں بنگلور میں تمل بولنے والوں کو نشانہ بنایا گیا جس میں اٹھارہ افراد ہلاک اور کئی زخمی ہوگۓ تھے۔

بنگلور کے علاوہ منڈیااور میسور جیسے علاقوں میں بھی تملوں کو تشدد کا نشانہ بنایا گیا تھا۔

بنگلور کے پولیس کمشنر راچیوت راؤ نے بی بی سی کو بتایا کہ ’ ریاست میں 1991جسی صورتحال سے بچنے کے لیے ہی بنگلور میں ہزاروں کی تعداد میں پولیس تعینات کی گئی ہے‘ ۔

بنگلور میں حال ہی میں فرقہ وارانہ فساد بھی ہوئے ہیں اور ایسے حالات میں محکمہۂ پولیس اس بات کی پوری کوشش کررہا ہے کہ شہر میں کوئی ناخشگوار واقعہ پیش نہ آئے۔

مسٹر راؤ کا کہنا تھا کہ’ پولیس کے اہلکاروں کو امن اور قانون برقرار رکھنے کے لیے کسی بھی صورتحال سے سختی سے نمٹنے کی ہدایات دی گئی ہیں ‘۔

کرناٹک کے وزیر اعلی ایچ ڈی کروناندھی نےعوام سے اپیل کی ہے کہ ’اگر ٹرائبیونل کا فیصلہ کرناٹک کے حق میں نہیں بھی آتا ہے تو بھی ریاست میں امن قائم رکھيں‘۔

کرناٹک تملز فیڈریشن نے صدر جمہوریہ اے پی جے ابولکلام کو خط کے ذریعے کہا کہ وہ بنگلور میں رہنے والے تملوں کو ضروری حفاظت فراہم کرنے کے احکامات جاری کریں ۔