’ہندوستان اور پاکستان کی عوام کی تقدیر مشترک ہے‘

صفدر جنگ ہسپتال میں سمجھوتہ ایکسپریس کے زخمی مسافروں کی عیادت کے بعد منموہن سنگھ نے کہا کہ سمجھوتہ ایکسپریس میں دھماکہ’ ایک بھیانک جرم تھا اور اس جرم کے مرتکبین کو اس کی سزا دی جائےگی‘۔

وزیرِاعظم نے کہا کہ دہشتگرد ہندوستان اور پاکستان کے بہتر ہوتے ہوئے تعلقات خراب کرنا اور امن کے اس عمل میں رکاوٹ ڈالنا چاہتے ہيں’جو اطمینان بخش طریقے سے آگے بڑھ رہا ہے‘۔

انہوں نے کہا کہ یہ دونوں ملکوں کا پختہ عزم ہے کہ’ہم دہشتگردوں کے ناپاک عزائم کو کامیاب نہیں ہونے دیں گے‘۔ انہوں نے کہا کہ سمجھوتہ ایکسپریس کے متاثرہ مسافروں کو سب سے بہترین خراج عقیدت یہی ہوگا کہ دونوں ممالک امن کے عمل کو مزید مستحکم کرنے کا عہد کریں۔

ان کا کہنا تھا’میں نے ہمیشہ اس بات پر یقین کیا ہےکہ ہندوستان اور پاکستان کی عوام کی تقدیر مشترک ہے‘۔

اس سے قبل منگل کی سہ پہر بھارت کے دورے پر نئی دلی پہنچنے کے بعد پاکستانی وزیرِ خارجہ خورشید قصوری نے بھی کہا تھا کہ ان دھماکوں نے ایک بار پھر یہ واضح کر دیا ہے کہ دہشت گردی ایک عالمی لعنت بن چکی ہے اور دونوں ملکوں کو اس سے نمٹنے کے لیے بامعنی باہمی تعاون کی ضرورت ہے۔