فرید آباد میں ہجوم پر قابو پانے کے لیے پولیس نے ہوا میں فائرنگ کی

اب اس معاملے میں کشیدگی کئی دیگر ضلعوں تک پھیل گئی ہے اور کئی علاقوں میں تشدد کے تازہ واقعات ہوئے ہیں۔

غیر سرکاری ذرائع کے مطابق جمعہ کے واقعات میں نوافراد مارے گئے ہیں اور کم از کم سترہ افراد زخمی بھی ہوئے ہیں۔

ادھر راجستھان کی مینا برادری کے لوگوں کی طرف سے گُجروں کے مطالبے کی سخت مخالفت جاری ہے اور اب مینا برادری اور گجروں کے درمیان زبردست کشیدگی پائی جا رہی ہے۔ تازہ اطلاعات کے مطابق دونوں برادریوں کے درمیان جھڑپ میں دو افراد ہلاک ہوئے ہیں اور جھڑپوں کے مزید پھیلنے کا خدشہ ہے۔

راجستھان میں بی بی سی کے نامہ نگار نارائن باریٹھ کے مطابق جمعہ کے روز ہلاکتوں کی بڑی وجہ مینا اور گوجر برادری کے درمیان جھڑپیں تھیں۔ بقول ان کے کشیدگی زیادہ ہے جس پر قابو پانے کے لیے جگہ جگہ نیم فوجی دستے تعینات کیے گئے ہیں۔

	قبیلے والے احتجاجاً مرنے والوں کی آخری رسومات ادا نہیں کر رہے

جمعہ کو فرید آباد میں مشتعل ہجوم پر قابو پانے کے لیے پولیس نے ہوا میں فائرنگ کی جبکہ پولیس کی ایک جیپ کو آگ لگا دی گئی۔

جمعرات کو گجر لیڈروں اور حکومت کے درمیان بات چيت بغیر کسی نتیجہ کے ختم ہوگئی تھی جو جمعہ کو پھر شروع ہوئی ہے۔گجروں کے ایک رہنما کرنل کروری لال بیسالہ نے کہا: ’یہ چوتھے دور کی بات چیت ہے اور اگر یہ بھی ناکام رہی تو پھر ہم بات نہیں کریں گے، پھر نیشنل ہائی وے کو جام کرنے کی بجائے احتجاج کا کوئی دوسرا طریقہ تلاش کیا جائے گا۔‘

نیشنل ہائی وے گزشتہ کئی روز سے بند ہے جس سے راجستھان، ہریانہ اور اس علاقے سے گزرنے والی تمام بسیں، ٹرک اور ٹرینیں بند پڑی ہیں۔ مینا برادری نے کہا ہے کہ اگر ہائی وے نہیں کھلی تو وہ خود اس کے خلاف کارروائی شرع کریں گے۔ ریاست کے وزیر داخلہ گلاب چند کٹاریا کا کہنا ہے کہ گزشتہ پچاس برسوں میں ریاست میں اس طرح کا تشدد دیکھنے کو نہیں ملا ہے۔

اس مسئلے سے نمٹنے میں ناکامی پر ریاست کی وزیراعلی وسندھرا راجے سندھیا پر سخت نکتہ چینی ہورہی ہے۔ ریاستی حکومت میں اس معاملے پر اختلافات بھی ابھر کر سامنے آگئے ہیں۔ اس کے علاوہ مینا اور گجر برادریوں کے ریاستی وزراء مخالفانہ بیانات دے رہے ہیں۔