نارائن باریٹھ بی بی سی، جے پور

	ریاست کے آٹھ اضلاع میں گجر برادری سیاسی طور پر کافی مضبوط ہے

بدھ کو ریاستی حکومت اور گجر برادری کے درمیان پہلے دور کی بات چيت ہوئی ہے اور جمعرات کو ایک بار پھر دوبارہ دونوں فریقوں کے درمیان بات چيت متوقع ہے۔ حکومت کی جانب سے بات چيت میں ریاستی کابینہ کے چار وزراء حصہ لے رہے ہیں۔

راجستان میں ہڑتال، ہلاکتیں

ابتدائی اطلاعات کے مطابق ریاست میں ہڑتال کے سبب ریل اور روڈ سروس بعض اضلاع میں معطل ہے۔ اور گزشتہ منگل سے جے پور آگرہ قومی شاہرہ اب بھی بند ہے۔

گجر برادری کے مطالبے کے حق میں حکمراں جماعت بھارتیہ جنتا پارٹی کے چار اسمبلی ارکان اور ایک وزیر نے اپنی رکنیت اور عہدہ سے مستعفی ہونے کا مسودہ پارٹی کے سربراہ کے پاس بھیج دیا ہے۔

خیال رہے کہ گزشتہ منگل کودوسا ضلع میں ریزرویشن کے مطالبے کے لیے مظاہرہ کرنے والی گجر برادری پر پولیس کی فائرنگ سے دو پولیس اہلکاروں سمیت چودہ افراد کی ہلاکت کے بعد سے ریاست میں حالات خراب ہو گئے ہیں۔

گزشتہ منگل کو ہلاک ہونے والوں میں سے چھ افراد کی آخری رسومات اب بھی ادا نہیں کی گئی ہیں اور گجر برادری کا مطالبہ ہےکہ جب تک ریزرویشن کے مطالبے کو قبول نہيں کر لیا جاتا اس وقت تک آخری رسومات نہيں کی جائے گی۔

ریاست کے آٹھ اضلاع میں گجر برادری سیاسی طور پر کافی مضبوط ہے اور ’فہرست قبائل‘ میں اپنی شمولیت کے لیے مظاہرہ کر رہے ہیں تاکہ ان کی برادری کو بھی وہ تمام مراعات حاصل ہو سکیں جو سرکاری سطح پر قبائلیوں کو ملتی ہیں۔

دوسری جانب ’ فہرست قبائل‘ میں شامل ذاتیں گجر برادری کو قبائلی فہرست میں شامل کیے جانے کی مخالفت کر رہی ہیں اور درج فہرست قبائل میں شامل ’مینا برادری‘ ميں بھی غصہ بڑھ رہا ہے۔ ریاست میں مینا برادری ميں کی آبادی دس فیصد ہے۔