گزشتہ چند روز میں شمالی ہندوستان کے بہت سے علاقوں میں کئي بار زوردار آندھیاں اور بارشیں آئی ہیں

گزشتہ چند روز میں شمالی ہندوستان کے بہت سے علاقوں میں کئي بار زوردار آندھیاں آئی ہیں جس سے آم کی فصل کو بھی زبردست نقصان پہنچا ہے۔

پولیس کے مطابق جمعہ کی شام زبردست آندھی سے کئی درخت گر گئے زیادہ تر ہلاکتیں پیڑ گرنے کے سبب ہوئی ہیں۔ ضلع سلطان پور میں چوبیس اور پرتاپ گڑھ میں تین افرد ہلاک ہوئے ہیں۔

ضلع مجسٹریٹ سنجے کمار کے مطابق آندھی سے کئی مقامات پر آگ لگنے سے بہت سے مکانات بھی جل گئے ہیں۔ ان کا کہنا تھا کہ گرد و غبار والی طوفانی ہواؤں سے ہوئے نقصان کا جائزہ لینے کے لیے ایک ٹیم تشکیل دی گئی ہے۔

شمالی ہندوستان میں آم کی فصل ابھی تیار ہورہی ہے اور آندھی کی وجہ سے سب سے زیادہ نقصان اسی فصل کو پہنچا ہے جس سے بڑی مقدار میں کچا آم ٹوٹ کر زمین پر گر رہا ہے۔

دلی اور لکھنؤ جیسے بڑے شہروں میں بھی آندھی سے کئی مقامات پر درختوں کے گرنے کے واقعات پیش آئے ہیں جس سے جانی و مالی نقصان تو نہیں ہوا لیکن ٹریفک ضرور متاثر ہوا ہے۔

دلی میں گزشتہ دو تین روز میں گرد و غبار کے ساتھ طوفانی ہوائیں چلی ہیں اور ژالہ باری کے ساتھ ساتھ بارش بھی ہوئی ہے جس سے گرمی کی شدت میں کمی ہوئی ہے۔