ریحانہ بستی والا بی بی سی اردو ڈاٹ کام، ممبئی

	ممبئی میں زیرتعمیر عمارتوں کے گرنے کے کئی واقعات پیش آئے ہیں

زخمیوں کا بھگوتی ہسپتال میں علاج جاری ہے۔ یہ حادثہ منگل کی شام پیش آيا تھا۔ اس وقت بارہ مزدور عمارت کا تعمیراتی کام کر رہے تھے۔

ڈپٹی پولیس کمشنر شیواجی راؤ بوڑکھے نے بی بی سی کو بتایا کہ اس معاملہ کی تفتیش جاری ہے۔ ڈی سی پی کے مطابق اس علاقے میں ’رائل پالمز سوسائٹی‘ کے تقریبا پینسٹھ بنگلے زیرتعمیر ہیں اور یہ بنگلہ ان میں سے ایک تھا۔

پولیس کے مطابق اس بنگلہ کا کام ’المہندی کنسٹرکشن کمپنی‘ کے ذمہ تھا۔ پولیس ان سے تفتیش کر رہی ہے۔ پولیس نے شبہ ظاہر کیا ہے کہ عمارت کی تعمیر میں ناقص مٹیریل کا استعمال کیا گیا ہوگا۔ ڈی سی پی کے مطابق انہوں نے استعمال ہونے والا مال جانچ کے لیے بھیج دیا ہے۔

	ہلاک ہونے والے مزدوروں کے پریشان حال رشتہ دار

اس حادثہ میں ہلاک ہونے والے مزدور کرناٹک اور مغربی بنگال کے رہنے والے تھے جو کام کی تلاش میں اپنے خاندان کے ساتھ ممبئی آئے تھے۔

ممبئی کا دائرہ وسیع ہوتا جا رہا ہے اور اسی لیے اس کے مضافات میں تعمیراتی کام ہوتے رہتے ہیں۔ یہاں کام کی تلاش میں اکثر آندھرا پردیش کے غریب بے روزگار افراد تعمیراتی کام کرتے ہیں۔ یہاں مزدوروں کی حفاظت کے لیے کوئی خاص انتظام نہیں ہے اور عمارت کی تعمیر کے لیے بنائے گئے قانون پر شاید ہی کوئی ٹھیکہ دار عمل کرتا ہو۔