ریحانہ بستی والا بی بی سی اردو ڈاٹ کام، ممبئی

	امدادی ٹیموں کو شبہ ہے کہ ملبے کے نیچے مزید لاشیں ہو سکتی ہیں

فائر کنٹرول کے مطابق ممبئی کے مضافاتی گورے گاؤں نامی علاقے میں دو منزلہ بنگلہ کا تعمیراتی کام چل رہا تھا۔ شام کے سات بجے کے قریب اچانک اس عمارت کا ایک حصہ ریت کی طرح ڈھیر ہو گیا۔

فائر کنٹرول کا کہنا ہے کہ ملبے سے انہوں نے چار مزدوروں کی لاشوں کو نکالا ہے جبکہ تین زخمی مزدوروں کو بھگوتی ہسپتال میں علاج کے لئے داخل کیا گیا ہے۔

ملبہ ہٹانے کا کام جاری ہے۔ فائر بریگیڈ کے عملے کو اس ملبہ میں مزید مزدوروں کے دبے ہونے کا خدشہ ہے۔

پولیس نے شبہ ظاہر کیا ہے کہ عمارت کی تعمیر میں ناقص میٹریل کا استعمال کیا گیا ہو گا۔