خدیجہ عارف بی بی سی اردو ڈاٹ کام، دلی

	ہندوستانی خواتین ہر شعبہ میں اپنی مہارت دکھانا چاہتی ہیں

ایسوچیم کے جائزے کے مطابق سنہ دوہزار چار میں پبلک اور نجی سیکٹرز میں خواتین ملازمین کی تعداد انیس سو اٹھانوے کی نسبت 27 اعشاریہ 63 لاکھ سے بڑھ کر اٹھائیس اعشاریہ نو لاکھ ہوگئی ہے۔ یعنی گزشتہ چھ برس میں خواتین ملازمین کی تعداد میں چار اعشاریہ چھ فیصد اضافہ ہوا ہے۔ جبکہ جائزے میں یہ بھی بتایا گیا ہے کہ مرد ملازمین کی تعداد میں تقریبًا آٹھ فیصد کمی ہوئی ہے۔

ایسواچیم کے جائزے کے مطابق ہندوستان میں نجی سیکٹرز کے مقابلے میں پبلک سیکٹر میں خواتین کی تعداد زیادہ تیزی سے بڑھی ہے۔ رپورٹ کے مطابق حکومت نے نہ صرف شہروں میں بلکہ دیہی علاقوں میں خواتین ملازمین کی تعداد بڑھانے کے لیے بعض ایسے اقدامات کیے ہیں جس سے وہ اقتصادی طور پر آزاد ہوسکیں۔

اقتصادیات کے ماہر ڈاکٹر بھارت جھنجھن والا کا خيال ہے کہ ’ہندوستان کے دیہات میں خواتین پہلے بھی اتنا ہی کام کرتی تھیں جتنا مرد کر تے تھے لیکن شہری ملازمتوں میں خواتین کی تعداد میں اضافہ ایک کلچرل تبدیلی ہے‘۔

	’دیہات میں خواتین پہلے بھی اتنا ہی کام کرتی تھیں جتنا مرد کر تے تھے‘

سماجی کارکن رنجنا کماری کا کہنا ہے کہ ہندوستان میں پبلک سیکٹر میں خواتین ملازمین کی تعداد بڑھنے کی ایک وجہ یہ ہے کہ حکومت نے اس برس ’جینڈر سپسیفک بجٹ‘میں خواتین کے لیے نہ صرف مرکزی بلکہ ریاستی سطح پربھی بعض ایسی سکیموں کی تجویز پیش کی ہے جس سے خواتین کو آگے بڑھنے میں مدد ملے گی۔

ماہرین کا کہنا ہے کہ ہندوستان میں بین الاقوامی کمپنیوں کے فروغ کے بعد ملازمت کے مواقع بڑھ رہے ہیں اور پرائیویٹ کمپنیوں میں مردوں کی نسبت عورتوں کو ترجیج دی جاتی ہے۔ ماہرین کا یہ بھی خيال ہے کہ جیسے جیسے ہندوستان ایک ترقی یافتہ ملک بننے کی طرف بڑھ رہا ہے ویسے ویسے وہ ہر شہری کو برابر مواقع فراہم کرنے کی کوشش کر رہا ہے۔