گاؤں کے لوگوں کے شور مچانے پر فوجیوں نے علاقے کا محاصرہ کرکے اس شدت پسند کو ہلاک کر دیا

بھارتی فوج کے ترجمان لیفٹینیٹ کرنل ایس ڈی گوسمی نے بتایا ہے کہ یہ شدت پسند جمعرات اور جمعہ کی درمیانی شب کو ضلع پونچھ کے گاؤں چاندیل کے ایک گھر میں زبردستی گھس گیا تھا جہاں اس نے چوبیس سالہ گلشن بانو کو گولی مار کر ہلاک کر دیا تھا۔

ترجمان کے مطابق اس شخص نے اس خاتون کو قتل کرنے کے بعد اسی گاؤں کے ایک اور گھر میں پناہ لینے کی کوشش کی جس پر گاؤں کے لوگوں نے شور مچا دیا اور فوج نے علاقے کا محاصرہ کرکے اسے ہلاک کر دیا۔

فوجی ترجمان کا کہنا ہے کہ اس شخص کا نام اشتیاق تھا اور وہ اس علاقے میں البدر کا کمانڈر تھا۔ فوج کے مطابق اس کے پاس سے بارود اور ہتھیار بھی برآمد کر لیے گئے ہیں۔

فوج کے مطابق ہلاک ہونے والا شخص شدت پسندی کے کئی واقعات میں ملوث تھا اور اس کی ہلاکت کو فوج کی بہت بڑی کامیابی قرار دیا جا رہا ہے۔