بینو جوشی بی بی سی، جموں

	پولیس کے مطابق یہ واقعہ جموں کے پونچھ ضلع میں پیش آیا

پولیس کے مطابق یہ واقعہ جموں کے پونچھ ضلع میں پیش آیا۔ پولیس کا کہنا ہے کہ اسے اطلاع ملی تھی کہ ضلع کے مستان دھارا علاقے کے جنگلوں میں شدت پسند موجود ہیں۔

شدت پسندوں کی تلاش میں پونچھ ضلع کے جنگلات میں فوج اور پولیس نے اپنا آپریشن شروع کیا تھا۔ پولیس کے مطابق شدت پسند جہاں چھپے ہوئے تھے اس جگہ کو فوج نے گھیر لیا تھا۔ اور جواب میں شدت پسندوں نے فوج پر گولہ باری شروع کردی۔

ہلاک ہونے والے فوج کے اہلکاروں میں ایک جونئیر افسر اور تین فوجی جوان تھے۔

شدت پسندوں کی طرف سے جاری گولی باری کو دیکھتے ہوئے جہاں جھڑپ ہورہی ہے وہاں مزید فوجی جوان بھیج دیۓ گۓ ہیں۔

خود کو انتہا پسند تنظیم المنصورین کا ترجمان بتانے والے ایک شخص نے جموں میں بی بی سی کے دفتر فون کرکے بتایا ہے کہ فوج کے ساتھ جھڑپ میں ملوث افراد کا تعلق ان کی تنظيم سے ہے۔ انہوں نے یہ بھی دعوی کیا ہے کہ المنصورین کے کارکنوں نے ابھی تک سات فوجیوں کو مار دیا ہے۔ لیکن فوج کے حکام کا کہنا کہ اس جھڑپ میں انکے صرف چار جوان ہلاک ہوئے ہیں۔