کلدیپ شرما سب سے پرانے ہندو عسکریت پسندوں میں سے تھے

جمعرات کی علی الصبح ہونےوالی اس کارروائی کے بارے میں فوجی حکام کا کہنا ہے کہ کلہند کے قریب پہاڑی جنگل میں عسکریت پسندوں کے ایک ٹھکانے کی اطلاعات کے بعد فوج نے علاقہ کا محاصرہ کیا۔ ٹھکانے کے گرد گھیرا تنگ ہونے پر فائرنگ کا تبادلہ شروع ہوا جو ذرائع کے مطابق دوگھنٹوں سے زیادہ دیر جاری رہا۔

ذرائع کے مطابق اس لڑائی میں دو عسکریت پسند مارے گئے جن کی شناخت ہو گئی ہے۔ ایک کا نام کلدیپ شرما عرف کامران ہے جبکہ دوسرے کا خالد کشمیری اور دونوں کا تعلق حزب المجاہدین سے تھا۔

ذرائع کا کہنا ہے کہ کلدیپ شرما سب سے پرانے ہندو عسکریت پسندوں میں سے تھے جو کہ انیس سو اٹھانوے سے کئی حملوں میں ملوث تھے جن میں سیکورٹی فورسز کی ہلاکتیں بھی شامل ہیں۔

کلہند ضلع ڈوڈا کا وہی علاقہ ہے جہاں اس سال یکم مئی کو اٹھارہ ہندو عسکریت پسندوں کو ہلاک کر دیا گیا تھا جس کے بارے میں سکیورٹی فورسز کا کہنا تھا کہ یہ لشکر طیبہ نے کیا تھا۔

گزشتہ سال اکتوبر میں بھی ایک کارروائی میں ایک ہندو عسکریت پسند مارا گیا تھا جس کے بارے میں بتایا گیا تھا کہ اس کا نام اتم سنگھ تھا اور اس کا تعلق بھی ضلع ڈوڈا کے ہی ایک گاؤں بسران سے تھا۔ وہ حزب المجاہدین کے ’سیکشن کمانڈر‘ تھے۔

ہندو عسکریت پسندوں کی ایک مسلمان گروپ میں شمولیت کے بارے میں اطلاعات میں کہا جا رہا ہے کہ یہ لوگ ایسا ’یا تو پیسے کی خاطر کرتے ہیں یا بندوق کی طاقت کے دکھاوے کے لیئے۔‘ حکام کے مطابق ان اطلاعات کو تقویت اس وقت ملتی ہے ’جب کوئی ہندوں عسکریت پسند پکڑا یا مارا جاتا ہے۔‘

گزشتہ سال پولیس نے کہا تھا کہ ان کی اطلاعات کے مطابق ایک درجن سے زائد پسند عسکریت پسندوں نے حزب المجاہدین میں شمولیت اختیار کر رکھی ہے۔