منموہن ہوجنتاؤ ملاقات کے بعد دونوں ملکوں میں 13‎معاہدوں پر دستخط ہوئے

صدر ہوجنتاؤ نے یہ بات ہند پاک کے تعلقات میں آئی بہتری کے پیش نظر کہی ہے ۔

نیوز ایجنسی پریس ٹرسٹ آف انڈیا کے مطابق مسٹر ہوجنتاؤ نے کہا ہے ’چین ہندوستان اور پاکستان کے رشتوں میں آئی بہتری کا خیر مقدم کرتا ہے‘۔

صدر ہو جنتا‎ؤ ہندوستان کے اپنے چار روزہ دورے کے تیسرے دن ممبئی روانگی سے قبل دلی کے سیاسی رہنماؤں، ماہرین معاشیات اور اعلی اہلکاروں سے خطاب کررہے تھے۔

صدر ہوجنتاؤ نے کہا کہ چین جنوبی ایشیا میں صرف اپنے مفاد کے بارے میں نہیں سوچتا ہے بلکہ پورے جنوبی ایشیا میں امن کی بحالی اور ترقی میں وہ ایک اہم اور عملی کردار ادا کرنے کو تیار ہے۔

ہوجنتا‎ؤ پیر کو ہندوستان کے دورے پر آئے تھے۔ ان کا کہنا تھا کہ پرامن اور خوشگوار جنوبی ایشیا ہی خطے اور پوری دنیا کے مفاد میں ہے۔ چار روزہ دورے کی ابتداء میں ہندوستان کے وزیراعظم منموہن سنگھ سمیت کئی سیاست دانوں اور سرمایہ کاروں سے ملاقات کی۔ منموہن سنگھ اور ہو جنتاؤ کی ملاقات کے بعد دونوں ملکوں کے درمیان 13‎معاہدوں پر دستخط ہوئے ہیں۔

دونوں ملکوں کے درمیان اقتصادیات، تجارت، اطلاعات، سائنس و ٹیکنالوجی، مالیات، توانائی، زراعت، تعلیم اور انسانی وسائل کے فروغ کے شعبے میں اشتراک و تعاون کے تیرا معاہدوں پر دستخط کیے گئے۔

دونوں رہنماؤں نے سرحدی تنازعے پر بھی بات کی ہے اور اس میں ہونے والی پیش رفت پر اطمینان کا اظہار کیا ہے اور اس بات سے بھی اتفاق کیا گیا کہ سرحدی تنازعے کو اقتصادی اور تجارتی تعلقات کے فروغ میں رکاوٹ نہیں بننے دیا جائےگا۔

جمعرات کو اپنے دورے کے اختتام پر چینی صدر پاکستان کے لیے روانہ ہونے سے قبل آگرہ کا بھی دورہ کریں گے۔