بی بی سی کے نامہ نگار داس گپتا نے بھارتی وزارتِ خارجہ کے ایک ترجمان نوتیج سرنا کے حوالے سے کہا ہے کہ دونوں ملکوں کے درمیان سرحدی تنازع حل کرنے کے بارے میں معاہدے پر دستخط ہو سکتے ہیں۔

چین کے وزیر اعظم وین جیا باؤ بھارت کے اپنے دورے کے دوران آج بھارتی وزیر اعظم من موہن سنگھ سے ملاقات کر رہے ہیں جس میں ہمالیہ کی سرحد پر تنازعہ پر مذاکرات کے علاو باہمی امور پر بات چیت متوقع ہے۔ اس کے علاوہ دونوں وزراء اعظم بھارت اور چین کے درمیان آزاد تجارت کے امکان پر بھی غور کریں گے۔

چین کے وزیر اعظم وین جیا باؤ نے اتوار کو بنگلور سے اپنے بھارت کے دورے کا آغاز کیا تھا۔ بھارت کے انفارمیشن ٹیکنالوجی کے مرکز، بنگلور کے دورے کے دوران چینی وزیر اعظم نے دونوں ملکوں کے درمیان کمپیوٹر کے شعبے میں تعاون کو بڑھانے کی ضرورت پر زور دیا تھا۔

انہوں نے کہا تھا اگر کمپیوٹر کے شعبے میں دونوں ملک تعاون کریں تو وہ پوری دنیا پر سبقت حاصل کر سکتے ہیں۔

ہمالیہ کے پہاڑی سلسلے میں سرحد کے تنازعہ پر دونوں ملکوں کے درمیان انیس سو باسٹھ میں جنگ بھی ہو چکی ہے۔