صلاح الدین بی بی سی اردو ڈاٹ کام دلی

	افضل نے جیل حکام سے پڑھنے کے لیے ذہبی کتابیں طلب کی ہیں

شاعری سے عسکریت پسندی تک

موت اور زندگی کی کشمکش کے درمیان محمد افضل گرو دِلی کی تہاڑ جیل کی مخصوص وارڈ میں قید ہیں۔ ان کی پھانسی کے لیے تمام بند و بست ہوچکے ہیں۔ پھندے کے لیے رسی ریاست بہار سے آئی ہے اور جّلاد پڑوسی شہر میرٹھ سے لیکن اس پورے عمل میں افضل کی اہلیہ تبسم کی رحم کی اپیل حائل ہے جس پر صدر اے پی جے عبد الکلام نے کوئی فیصلہ نہیں کیا۔

تہاڑ جیل کےحکام نے بی بی سی کو بتایا ہے کہ رحم کی اپیل پر جب تک ایوان صدر سے کوئی فیصلہ نہیں آتا افضل کی پھانسی ملتوی کر دی گئی ہے۔ اسی دوران خود افضل نے ذاتی طور پر بھی صدر سے رحم کی اپیل کرنےکا فیصلہ کیا ہے۔ افضل کی وکیل نندتا ہکسر نے بتایا ہے کہ وہ افضل کی رحم کی اپیل کامتن تیار کر رہی ہیں جسے جلد ہی صدر کو پیش کیا جائے گا۔

افضل کی اہلیہ کی رحم کی اپیل صدر نے وزارت داخلہ کے پاس حکومت سے رائے طلبی کے لیے بھیجی تھی جس کا جواب وزارت داخلہ نے ابھی تک نہیں دیا ہے۔

	افضل گورو کی والدہ

وزارت قانون کے مطابق حالات اور کوائف پوری طرح افضل کے خلاف تھے اور منصفانہ طریقے سے مقدمے کے بعد عدالت نے سزائے موت سنائی ہے۔

اصولی طور پر وزارت داخلہ وزارت قانون سے صلاح و مشورہ کرتی ہے پھر اپنی سفارشات کابینہ کو بھیجتی ہے اور تب حکومت اپنی رائے صدر کو دیتی ہے۔ صدر انہیں سفارشات کی بنیاد پر کوئی فیصلہ کرتا ہے لیکن وہ حکومت کے مشورے کا پابند نہیں ہے اور آئینی طور پر وہ اپنی مرضی سے فیصلہ کرنے کا مجاز ہے۔

فی الوقت قانونی پیچیدگیوں اور دفتری خانہ پری کی تاخیر کے سبب یہ معاملہ ٹل گیا ہے۔ دریں اثناء افضل نے جیل حکام سے پڑھنے کے لیے کچھ مذہبی کتابیں طلب کی ہیں۔