عمر فاروق بی بی سی اردو ڈاٹ کام، حیدرآباد دکن

	مقامی مسلمان پولیس پر جانبداری اور تعصب کا الزام بھی لگارہے ہیں

کافی طویل عرصہ کے بعد آندھراپردیش میں فرقہ وارانہ تشدد اور کشیدگی کے مسئلہ نے دوبارہ سر اٹھایا ہے۔ اب کی بار اس کا نشانہ حساس شہر حیدرآباد نہیں بلکہ ایک دور افتادہ مقام بودھن بنا ہے جہاں دسہرہ کے موقع پر درگا دیوی کے جلوس کے دوران ہندوؤں اورمسلمانوں کے درمیان بڑے پیمانے پر تشدد پھوٹ پڑا اور اس کا اثر علاقہ تلنگانہ کے پورے ضلع نظام آباد میں محسوس کیا گیا جہاں کئی مقامات پر دونوں فرقوں کے درمیان تصادم اور آتش زنی کے واقعات پیش آئے۔

کئی برسوں کے بعد اتنے بڑے پیمانے پر ہونے والے اس فرقہ وارانہ تشدد میں پولیس اور سرکاری مشینری کی ناکامی واضح طور پر دکھائی دے رہی ہے۔ گڑ بڑ کے آغاز کا سبب وہی تھا جو اس سے پہلے ہندوستان کے مختلف علاقوں میں ہزاروں دنگوں کی وجہ بن چکا ہے اور وہ تھا عین نماز کے وقت مسجد کے سامنے سے ہندو مذہبی جلوس کا گزرنا اور وہاں رک کر باجے بجانا اور اشتعال انگیز نعرے لگانا۔ مظاہرین کا الزام تھا کہ تشدد کی شروعات مسلمانوں کی جانب سے ہوئی کیونکہ مسجد کے اندر سے ان پر پتھر پھینکے گئے جبکہ مسلمانوں کا کہنا تھا کہ شروعات جلوسیوں کی طرف سے ہوئی۔ الزام اور جوابی الزام کا یہ ایسا سلسلہ ہے جس کے بارے میں کوئی حتمی فیصلہ نہیں کیا جاسکتا لیکن بنیادی سوال یہ ہے کہ عین نماز مغرب اور افطار کے وقت جامع مسجد کے سامنے سے دوسرے فرقہ کے مذہبی جلوس کو گزرنے کی اجازت کس نے اور کیوں دی؟ تشدد بھڑک اٹھنے کے بعد اسے روکنے اور اقلیتی فرقہ کی املاک کو بچانے کے لیئے پولیس نے فوری کارروائی کیوں نہیں کی؟

پولیس کی ناکامی کئی برسوں کے بعد اتنے بڑے پیمانے پر ہونے والے اس فرقہ وارانہ تشدد میں پولیس اور سرکاری مشنری کی ناکامی واضح طور پر دکھائی دے رہی ہے۔

ان واقعات نے پولیس کے ساتھ ساتھ کانگریسی حکومت کے رویہ اور کارکردگی پر بھی سوالیہ نشان لگادیئے ہیں۔ تلگودیشم کا 9 سالہ دور حکومت فرقہ وارانہ فسادات اور کشیدگی سے مکمل طور پر پاک رہا ہے لیکن جس طرح سے نظام آباد میں شرپسندوں کو من مانی کرنے کا موقع ملا ہے اس نے دونوں ہی فرقوں کے امن پسند عوام کو تشویش میں ڈال دیا ہے۔

	ان واقعات نے پولیس کے ساتھ ساتھ کانگریسی حکومت کے رویہ اور کارکردگی پر بھی سوالیہ نشان لگادیئے ہیں

ایک ایسے زمانے میں جبکہ مختلف ریاستوں میں مختلف سیاسی جماعتیں عوام کو چاول سے لے کر زمین اور رنگین ٹیلی ویژن تک مفت میں دینے کے وعدے کررہی ہیں کم سے کم ایک سیاسی جماعت نے یہ واضح کردیا ہے کہ وہ عوام کو کوئی چیز مفت میں دینے کا وعدہ نہیں کرے گی۔ یہ جرات مندانہ موقف اختیار کیا ہے ایک نئی سیاسی جماعت لوک ستہ نے جو ایک سابق آئی اے ایس آفیسر ڈاکٹر جے پرکاش نارائن نے تشکیل دی ہے-

1997 ء میں آئی اے ایس سے استعفی دے کر لوک ستہ کے نام سے ایک غیر سرکاری تنظیم بنانے والے نوجوان ڈاکٹر جے پرکاش نارائن اب تک کرپشن، سیاست میں مجرموں کے داخلے، پنچایت اداروں کو زیادہ اختیارات دینے اور انتظامی اصلاحات جیسے موضوعات پر کامیابی کے ساتھ مہم چلاتے رہے ہیں۔ اپنے اس کام کے لیئے قدرو منزلت کی نگاہ سے دیکھے جانے والے اور کئی اعزازات پانے والے جے پرکاش نارائن کا کہنا ہے کہ ان کی سیاسی جماعت کے لیئے اقتدار اصل منزل نہیں ہے بلکہ وہ اسے تبدیلی کے آلہ کے طور پر استعمال کرنا چاہتے ہیں- تو پھر اگر مفت چیزیں نہیں تو ان کی جماعت عوام کو کیا دے گی- ان کا کہنا ہے کہ وہ سب کے لئے تعلیم، اور سب کے لئے علاج و معالجہ کی مفت سہولت کا وعدہ کرتے ہیں کیونکہ یہ اس ملک کے بنیادی مسائل ہیں اور ان پر عمل کرنا ممکن ہے- ان کا نشانہ ہے کہ وہ 2007 تک آندھراپردیش میں اور 2010ء تک پورے ملک میں لوک ستہ کو ایک اہم سیاسی طاقت کے طور پر ابھاریں گے-

سائیکل پر سفر حج میں رکاوٹ، لیکن حوصلے بلند

	ویزے کے حصول میں دشواریوں نے اس قافلے کو اب تک دہلی میں ہی رکے رہنے پر مجبور کردیا ہے

محمد حنیف کا کہنا ہے کہ اس رکاوٹ کے باوجود ان کے عزم میں کوئی کمی نہیں آئی ہے اور جیسے ہی انہیں حکومت کی اجازت مل جاتی ہے وہ آگے کے سفر پر روانہ ہونے کے لئے تیار ہیں- محمد حنیف کا کہنا ہے کہ حیدرآباد سے دہلی تک لگ بھگ 1500 کیلو میٹر کا سفر انہوں نے جس آسانی کے ساتھ طے کیا اس نے ان کے حوصلے اور بھی بلند کردیئے ہیں-

عصری ٹیکنالوجی میں تحقیق کا نیا مرکز

	ڈیویلپمنٹ سنٹر میں جدید ترین تکنیک پر ریسرچ کی جائے گی

یہاں ہونے والے کام کی نوعیت کا اندازہ اس بات سے لگایا جاسکتا ہے کہ اس میں کمپنی ایسے عصری چپس کا ڈیزائن تیار کرے گی جنہیں بیک وقت کئی الیکٹرانک اور دوسرے آلات میں استعمال کیا جاسکے گا۔ پہلے اگر کوئی چپ کمپیوٹر یا ٹیلی ویژن جیسے سازوسامان میں استعمال ہوجاتی تھی تو پھر اسے کسی دوسرے مقصد کے لیئے استعمال نہیں کیا جاسکتا تھا لیکن ایف پی جی اے کہلانے والی یہ نئی چپ بیک وقت کئی آلات میں استعمال کی جاسکے گی اور اس سے آٹو موبائل، مواصلات، اشیائے صارفین اور دفاعی شعبہ میں استعمال ہونے والے آلات کو بہتر بنایا جاسکےگا-

گزشتہ برس پونے دو ارب ڈالر کا کاروبار کرنے والی اس کمپنی نے واضح نہیں کیا ہے کہ وہ حیدرآباد کے اس سینٹر کے قیام کے لیئے کتنی سرمایہ کررہی ہے لیکن اس کا کہنا ہے کہ یہ ہندوستان میں اس کے کام کی محض ایک شروعات ہے- کمپنی نے اس عصری ٹیکنالوجی میں نوجوان انجینئروں کی صلاحیتوں کو فروغ دینے کے لیئے آئی آئی ٹی بمبئی میں بھی اپنا ایک تربیتی مرکز قائم کرنے کا فیصلہ کیا ہے۔