الطاف حسین بی بی سی اردو ڈاٹ کام،سری نگر

	سری نگر میں شدت پسندوں کی تلاش ابھی بھی جاری ہے۔

ایک سینئر پولیس اہلکار نے بی بی سی کو بتایا ہے کہ ان دو شدت پسندوں کو جمعرات کی صبح ہلاک کیا گیا۔ اسی کے ساتھ بدھ کے روز نیم فوجی دستوں اور مشتبہ شدت پسندوں کے درمیان شروع ہونے والا تصادم ختم ہوگیا ہے۔

سری نگر کے لال چوک کے علاقے میں بدھ کے روز نیم فوجی دستوں اور مشتبہ شدت پسندوں کے درمیان فائرنگ کا تبادلہ شروع ہوا تھا۔

فوج اور شدت پسندوں کے درمیان یہ تبادلہ اس وقت شروع ہوا جب مشتبہ شدت پسندوں نے مقامی ہوٹل میں پناہ لے کر قریب میں واقع فوج کے کیمپ پر وقفے وقفے سے فائرنگ کرنا شروع کر دی۔فائرنگ کے تبادلے میں دو پولیس اہلکار بھی ہلاک ہوگۓ تھے۔

المنصورین نامی شدت پسند گروپ نے اس حملے کی ذمہ داری قبول کی ہے۔

حکام کے مطابق سری نگر میں شدت پسندوں کی تلاش ابھی بھی جاری ہے کیونکہ فوج کو خدشہ ہے کہ کچھ شدت پسند ابھی تک وہاں چھپے ہوئے ہیں۔