صلاح الدین بی بی سی اردو ڈاٹ کام، دلی

	سکھ نوجوان کے بال کاٹنے پر بھارتی پارلیمنٹ میں احتجاج کیا گیا ہے

چند روز قبل جے پور میں بعض نامعلوم افراد نے ایک سکھ لڑکے کو اغوا کر کے اس کے بال ’ کیس‘ کاٹ دیے تھے۔

پارلیمنٹ کا اجلاس شروع ہوتے ہی حکمراں جماعت کے بعض ارکان نے اس واقعے کا حوالہ دیتے ہوئے کہا کہ بھارتیہ جنتا پارٹی کی اقتدار والی ریاستوں میں اقلیتیں محفوظ نہیں ہیں۔اس پر ہنگامہ آرائی شروع ہوگئی اور لوک سبھا کے اجلاس کو ملتوی کرنا پڑا۔

بعد میں وزیر داخلہ شیو راج پاٹل نے اس پر بیان دیتے ہوئے کہا ہے کہ اس معاملے کی پولیس میں شکایت درج ہوچکی ہے اور ریاستی حکومت نے بعض پولیس افسران سمیت کئی افراد کے خلاف کارروائی کی ہے۔

	سکھ برادری میں اس واقعے پر سخت نارضگی پائی جاتی ہے

جے پور میں گزشتہ پیر کے روز بارہویں کلاس کے ایک سکھ طالب علم اندر پریت سنگھ کو اغوا کیا گیا تھا۔ اسے مارا پیٹا گیا اور بے عزتی کرنے کے لیے اسکے بال کاٹ دیۓ گیے تھے۔اطلاعات کے مطابق اندر دیپ کو یہ سزا اس لیئے دی گئی کہ اس نے لڑکیوں کے ساتھ چھیڑ چھاڑ کرنے والے بعض لوگوں کے خلاف آواز اٹھائی تھی۔

سکھ برادری میں اس واقعے پر سخت نارضگی پائی جاتی ہے۔ راجھستان، دلی اور پنجاب جیسی ریاستوں میں ہزاروں لوگوں نے اس کے خلاف احتجاجی مظاہرے کیے ہیں اور مجرموں کے خلاف سخت کارروائی کا مطالبہ کیا گیا ہے۔