ریحانہ بستی والا بی بی سی اردو ڈاٹ کام، ممبئی

	ان ملزمان کو ماٹونگاٹرین میں دھماکہ کرنے کے الزام میں گرفتار کیا گیا ہے

گرفتار افراد پر تعزیرات ہند کی دفعات 302, 306 326 کے تحت کیس درج کیا گیا ہے۔ ان ملزمان کو ماٹونگاٹرین میں دھماکہ کرنے کے الزام میں گرفتار کیا گیا ہے۔ ماٹونگا چونکہ ممبئی سینٹرل ریلوے پولیس سٹیشن کی حدود میں آتا ہے اس لیئے ان کے خلاف ممبئی سینٹرل پولیس سٹیشن میں کیس درج کیا گیا ہے۔

تینوں ملزمان کو جمعہ کی صبح عدالت میں پیش کیا گیا جہاں مجسٹریٹ نے ملزمان کو اکتیس جولائی تک پولیس حراست میں رکھنے کا حکم دیا ہے۔

رگھوونشی کے مطابق انہوں نے خلیل عزیز شیخ اور کمال محمد وکیل انصاری کو بہار کے شہر مدھوبنی سے گرفتار کیا جبکہ ممتاز چودھری کو نوی ممبئی کے علاقے تربھے سے حراست میں لیا گیا تھا۔

	دھماکوں کے الزام میں گرفتار افراد پولیس حراست میں

ممتاز کے بارے پولیس کا کہنا ہے کہ وہ نئی ممبئی میں گھروں میں جا کر بچوں کو مذہبی تعلیم دیتے تھے اور تینوں ایک دوسرے کے رشتہ دار بھی ہیں۔ ملزم کمال ممتاز کے بہنوئی بھی ہیں۔

رگھوونشی نے یہ بتانے سے انکار کر دیا کہ یہ تینوں ملزمان کس تنظیم سے تعلق رکھتے ہیں۔ پولیس نے بتایا کہ ابھی یہ شروعات ہے اور بہت جلد دیگر ملزمان بھی پولیس کی حراست میں ہوں گے۔