صلاح الدین بی بی سی اردو ڈاٹ کام دلی

	اختلافات 1984 میں اس وقت شروع ہوئے جب بھارت نے یہاں اپنی فوج اتار دی تھی

بھارت کے وزیر دفاع پرنب مکھرجی نے ایک بیان میں کہا ہے کہ ’بات چیت میں کوئی پیش رفت نہیں ہوئی ہے اور ہم نے آئندہ بھی بات چیت جاری رکھنے پر اتفاق کیا ہے‘۔ ایک سوال کے جواب میں انہوں نے کہا کہ چونکہ اس بار کوئی نتیجہ نہیں نکلا ہے اس لیئے یہ کہنا مشکل ہوگا کہ آئندہ کی بات چیت کس نوعیت کی ہوگی۔

سیاچن مسئلے کے حل کے لیے بھارت اور پاکستان نے نئی دہلی میں منگل کے روز بات چیت شروع کی تھی۔ اس سے پہلے بھی اس مسئلے پر نوبار بات چیت نا کام ہوچکی ہے۔

بھارت کا موقف ہے کہ سیاچن گلیشیئر پر فی الوقت جہاں فوج موجود ہے اگر اس پوزیشن کو تسلیم کرلیا جائے تو فوجیں ہٹائی جا سکتی ہیں۔ لیکن پاکستان صرف سنہ انیس سو چوارسی سے قبل کی صورتحال ماننے کو تیار ہے جب سیاچن گلیشیئرز بھارتی فوج سے پوری طرح خالی تھیں۔

	بی بی سی کے صحافی مکیش شرما حال ہی میں سیاچین کے دورے پر

کچھ برس قبل دونوں کے درمیان کشیدگی کے سبب جھڑپیں ہوئی تھیں جس کے بعد سے ساڑھے پانچ ہزار سے زیادہ میٹر اونچی ان پہاڑیوں پر دونوں جانب کی فوجیں تعینات ہیں۔

ان پہاڑیوں پر باہمی تصادم میں جہاں ہزاروں فوجی مارے گئے ہیں وہیں سخت سردی اور خراب موسم کے سبب بھی بہت سے جوان ہلاک ہوئے ہیں۔ دونوں ممالک کی کوشش ہے کہ اس پیچیدہ مسئلے پر کوئی پیش رفت ہو لیکن ماہرین کے مطابق مسئلے کا حل اس وقت تک مشکل ہے جب تک فریقین کا رویہ لچکدار نہیں ہوتا۔