امریکی صدر جارج بش بھارتی وزیراعظم منموہن سنگھ کے ہمراہ

دہلی میں اپنی تقریر کے دوران امریکی صدر ان اقدار کا ذکر کریں گے جو کہ دونوں ممالک کے اتحاد کا باعث ہیں۔

بش کی آمد پر مظاہرے

امریکہ اور انڈیانے جمعرات کو ایٹمی تعاون سے متعلق ایک متنازعہ معاہدے پر دستخط کیے ہیں۔ اس معاہدے کے بعد انڈیا کو ایٹمی عدم پھیلاؤ کے معاہدے پر دستخط نہ کرنے کے باوجود امریکی ٹیکنالوجی تک رسائی حاصل ہوگئی ہے۔

صدر بش بھارت کے دورے کے بعد جمعہ کی شام کو پاکستان پہنچ رہے ہیں جہاں مذاکرات کا بنیادی موضوع ’دہشتگردی کے خلاف جنگ‘ ہوگا۔

دریں اثناء عالمی ایٹمی ایجنسی نے امریکہ اور انڈیا کے دمریان ہونے والے معاہدے کا خیرمقدم کیا ہے۔ ادارے کے سربراہ محمد البرادعی نے کہا ہے کہ ’ یہ معاہدہ جوہری عدم پھیلاؤ، جوہری دہشتگردی سے مقابلے اور جوہری تحفظ کے لیے ایک اہم سنگِ میل ثابت ہوگا‘۔ انہوں نے کہا کہ اس معاہدے کو توانائی کے شعبے میں انڈیا کی بڑھتی ہوئی ضروریات کو پورا کرنے میں مدد ملے گی۔

تاہم امریکی کانگرس کے کچھ اراکین نے اس معاہدے پر خدشات کا اظہار کیا ہے جس کے تحت امریکہ نے انڈیا سے جوہری عدم پھیلاؤ کے معاہدے پر دستخط کرنے کا مطالبہ واپس لے لیا ہے۔

ان اراکین کا کہنا ہے کہ اس معاہدے کے نتیجے میں جوہری ہتھیاروں کے پھیلاؤ میں اضافہ ہو سکتا ہے۔ امریکی سینیٹر ایڈ مارکی کا کہنا ہے کہ ’ یہ ایک تاریخی جوہری ناکامی ہے جس میں امریکہ کی حفاظت پر سودے بازی ہوئی ہے‘۔