نادیہ پرویز بی بی سی اردو ڈاٹ کام دِلّی

	کسی سے رعایت نہیں برتی جائےگی خواہ وہ کتنے ہی بڑے عہدے پر کیوں نہ ہو‘

واجپئی کا کہنا تھا کہ ’جو کچھ بھی ہوا ہے اس میں ملوث رہنماؤں کے خلاف تادیبی کارروائی کرنے کے لیے پارٹی کے اعلیٰ ارکان صلاح و مشورہ کر رہے ہیں‘۔

انہوں نے مزید کہا کہ پارٹی کے اصولوں کی خلاف ورزی کرنے والے کسی بھی شخص سے رعایت نہیں برتی جائے گی خواہ وہ پارٹی میں کتنے ہی بڑے عہدے پر کیوں نہ ہو۔

کل مدھیہ پردیش کی دارالحکومت بھوپال میں بی جے پی کے ارکان اسمبلی کے ایک اجلاس کے دوران ریاست کی سابق وزیر اعلیٰ اوما بھارتی باہر چلی گئی تھیں۔

	اوما بھارتی

اجلاس سے باہر آ کر اوما بھارتی نے اپنی ناراضگی کا اظہار کرتے ہوئے کہا کہ ’ اسمبلی ارکان کی رائے جانے بغیر یوں وزیر اعلیٰ منتخب کرنا غیر آئینی ہے‘۔

اس کے بعد اوما بھارتی کے حامیوں نے پارٹی دفتر کے باہر توڑ پھوڑ کی اور رہنماؤں کے خلاف نعرے بھی لگائے۔ دلچسپ پہلو یہ ہے کہ توقع کے برعکس 150 سے زیادہ ارکان میں سے صرف 14 ارکان ہی اوما بھارتی کے حق میں سامنے آئے ۔

اوما بھارتی کی قیادت میں ہی بی جے پی نے مدھیہ پردیش میں دو تہائی کی اکثریت سے کامیابی حاصل کی تھی لیکن ان کو اس وقت وزیر اعلیٰ کے عہدے سے مستعفی ہونا پڑا تھا جب کرناٹک میں مسلمانوں کی ایک عبادت گاہ پر حملہ کرنے کے ایک معاملے میں وہاں کی مقامی عدالت نے ان کے خلاف وارنٹ جاری کر دیا۔

سابق وزیر علیٰ کی شکایت  اسمبلی ارکان کی رائے جانے بغیر یوں وزیر اعلیٰ منتخب کرنا غیر آئینی ہے اوما بھارتی

وہ اس سے قبل ایک بار مسٹر اڈوانی کی صدارت میں اعلیٰ رہنماؤں کے اجلاس سے واک آؤٹ کر چکی ہیں اور آر ایس ایس کو بھی انہوں نے اپنی نکتہ چینیوں کا نشانہ بنایا ہے۔

واجپئی کے بیان پر ردعمل ظاہر کرتے ہوئے بھارتی نے کہا کہ ’وہ ایک ایسے ہوائی جہاز کے پائلٹ نہ بنیں جو کبھی بھی اغوا ہو سکتا ہے‘۔