دختران ملت نے 1990 کی دہائی میں برقعہ پہننے کی مہم بھی شروع کی تھی جو زیادہ دن نہیں چل سکی

دختران ملت نامی تنظیم کے مریم دستے سے تعلق رکھنے والی یہ خواتین شراب نوشی اور جسم فروشی کے خلاف مہم چلا رہی تھیں۔ آسیہ اندرابی ایک علیحدگی پسند رہنما کے طور پر جانی جاتی ہیں۔

آسیہ اندرابی کا کہنا تھا کہ بھارت کشمیر میں کئی محاذوں پر لڑائی کر رہا ہے۔ انہوں نے کہا مسلمانوں میں ’اخلاقی گراوٹ‘ پیدا کرنا بھی بھارت کے منصوبے کا حصہ ہے۔ انہوں نے کہا کہ وہ بھارت کے اس منصوبے کو کامیاب نہیں ہونے نہیں دیں گی۔

ایک اعلیٰ پولیس اہلکار منیر خان نے خبر رساں ایجنسی رائٹرز کو بتایا کہ آسیہ اندرابی کو ایک ہوٹل میں ایک شادی شدہ جوڑے پر حملہ کرنے کے الزام میں گرفتار کیا گیا ہے۔ انہوں نے کہا کہ ’ضابطۂ اخلاق نافذ کرنے کا حق ان خواتین کو کس نے دیا ہے‘۔

شراب نوشی کی ایک دکان کے قریب ایک شخص کا کہنا تھا ’ہم نے وزیر اعلیٰ سے درخواست کی تھی کہ اس دوکان کو وہاں نہ کھولا جائے اس سے ہمارے بچوں پر برا اثر پڑتا ہے لیکن ہم سے کہا گیا کہ یہ ریاست میں حالات بحال ہونے کی علامت ہے‘۔

ایک اور شخص کا کہنا تھا ’ان عورتوں نے بڑی جرات کا کام کیا ہے ہم ان کی حمایت کرتے ہیں‘۔

ڈپٹی انسپکٹر جنرل آف پولیس ایچ کے لوہیا نے بی بی سی سے بات کرتے ہوئے اس طرح کے حملوں کو غیر قانونی قرار دیا۔

مریم دستے نے شہر کے حبہ کدل علاقے کا دورہ کر کے وہاں موجود قحبہ خانوں کو بند کرنے کا مطالبہ کیا تھا۔

اپنی اس مہم کا آغاز کرنے سے قبل دستے نے اصلاح پسند سبحان ہجام کے اعزاز میں ایک تقریب کا انعقاد کیا تھا۔

مرحوم سبحان ہجام نے سری نگر میں جسم فروشی کے کاروبار کے خلاف تنہا ہی مہم شروع کی تھی۔

ان کی اس مہم کے نتیجے میں حکومت نے ریاست میں قحبہ خانوں کو ممنوع قرار دے دیا تھا۔

دحتران ملت نے برقہ پہنے کی مہم بھی شروع کی تھی

سری نگر اور بھارت کے زیر انتظام کشمیر کےدوسرے کسی بھی علاقے میں قانونی طور پر کوئی ریڈ لائٹ علاقہ نہیں ہے لیکن پھر بھی جسم فروشی کا کاروبار رہا ہے۔

مسٹر لوہیا کا کہنا ہے کہ چھوٹے چھوٹے گروہ اب بھی اس کاروبار میں لگے ہوئے ہیں۔انہوں نے مزید بتایا کہ اس سال پولیس نے ایسے آٹھ گروہوں کا پردہ فاش کیا تھا۔

یہ دستہ اپنی مہم پوری ریاست میں شروع کرنے کا منصوبہ بنا رہا ہے۔

آسیہ اندرابی کا کہنا ہے کہ شراب اور جسم فروشی کے خلاف یہ مہم سری نگر سے شروع ہوئی ہے لیکن آہستہ آہستہ اسےریاست کے دوسرے علاقوں میں شروع کیا جائے گا۔

علیحدگی پسند مہم شروع ہونے کے بعد1989 سے وادی میں شراب کی دوکانیں اور سنیما ہال بند کر دیئے گئے تھے۔لیکن گزشتہ دو سال سے یہ دوبارہ کھلنے شروع ہو گئے ۔

دختران ملت نے 1990 کی دہائی میں مسلم خواتین کے برقعہ پہننے کی مہم بھی شروع کی تھی اس مہم کو ابتداء میں تو کامیابی ملی لیکن زیادہ دن نہیں چل سکی۔