کیتھلین میکال
|  |
لوگ کہتے ہیں کہ یہ ’دنیا میں اب تک کا سب سے بڑا دیو مالائی تھیم پارک‘ ہے۔ بھارت میں دریائے گنگا کے کنارے ڈزنی لینڈ کی طرز پر بنائے جانے والے اس تھیم پارک کا نام ’ گنگا دھام‘ ہے جہاں موجود رام، ہنومان اور کرشنا جیسے دیوتاؤں کی مورتیاں لوگوں کی دلچسپی کا مرکز ہوں گی۔ پچیس ایکڑ رقبے پر پھیلے اس پارک میں جدید جھولوں کی مدد سے ہندو دیوتاؤں سے متعلق داستانوں کو اجاگر کرنے کی کوشش کی جائے گی۔ اس کے علاوہ ایک اینیمیٹڈ دیو مالائی عجائب گھر، ’ٹمپل سٹی‘، خوراک کی فراہمی کے علاوہ ساؤنڈ اور لائٹ شو کا بھی اہتمام کیا گیا ہے۔ یہ پارک دریائے گنگا کے کنارے ہری دوار میں بنایا جا رہا ہے۔ کہا جاتا ہے کہ ہندو دیوتا وشنو اس شہر سے گزرے تھے۔ تقریباً ایک کروڑ اسی لاکھ افراد ہر سال اس شہر کی زیارت کو آتے ہیں۔ اس منصوبے کے چیف ایگزیکٹو شیو ساگر کا کہنا ہے کہ لوگ اپنے بچوں کے ہمراہ اس پارک کی سیر سے نہ صرف محظوظ ہوں گے بلکہ انہیں ہندو دیوتاؤں کی داستانوں سے بھی آگاہی حاصل ہو گی۔ اس پارک کی تعمیر کا کام اس سال کے آخر میں شروع ہو جائے گا جو توقع کے مطابق سنہ دو ہزار سات تک مکمل کر لیا جائے گا۔ | 
یہ صفحہ دوست کو ای میل کیجیئے
پرِنٹ کریں
