عورتوں میں اس جرثومے کا شکار ہونے کا خطرہ زیادہ ہے

سائنسدانوں کا خیال ہے کہ ہندوستانیوں کے جسم میں اس جرثومے کا مقابلہ کرنے کے لئے قوتِ مدافعت کم ہوتی ہے۔

بھارت کا کہنا ہے کہ اس کے شہریوں میں پانچ ملین سے زیادہ لوگ ایچ آئی وی جرثومے کا شکار ہیں جو جنوبی افریقہ کے بعد دوسرے نمبر پر ہے۔ خیال کیا جاتا ہے کہ بھارت میں درحقیقت ایچ آئی وی سے متاثرہ لوگوں کی تعداد اس سے کہیں زیادہ ہے ۔

دو سال کے اس جائزے میں آل انڈیا انسٹی ٹیوٹ آف میڈیکل سائنسز کے سائنس دانوں نے ایچ آئی وی سے متاثرہ 200 لوگوں اور 200 صحت مند لوگوں کا جائزہ لیا ۔

اس تحقیقاتی ٹیم کے سربراہ ڈاکٹر این کے مہرہ نے بی بی سی کو بتایا کےجائزے سے پتہ چلا کہ بھارتیوں میں اس بیماریوں سے تحفظ فراہم کرنے والے جینز کم اور نقصان پہنچانے والے جینز عام طور پر زیاد ہوتے ہیں۔

بھارت ایڈز کی روک تھام کے لئے ٹیکہ بنانے کی کوشش کر رہا ہے اور سائنس دانوں کا خیال ہے کہ یہ ایک اہم انکشاف ثابت ہو سکتا ہے۔ اگر یہ جائزہ صحیح ثابت ہوگیا تو اس سے جینز کے مختلف پہلٰوؤں ،ایڈز کے جرثومے اور ایڈز کی تحقیق میں مدد مل سکتی ہے۔

دو سال پہلے امریکہ کی نیشنل انٹیلی جنس کونسل نے بتایا تھا کہ ایک اندازے کے مطابق بھارت میں پانچ سے آٹھ ملین افراد ایچ آئی وی کے جرثومے سے متاثر ہیں اور 2010 تک یہ تعداد 20 سے 25 ملین تک پہنچ سکتی ہے۔

سرکاری رپورٹ کے مطابق بھارت میں اس جرثومے کا شکار ہونے والے نئے افراد میں 10 سے 25 سال کی عمر کے لوگ ہیں۔ رپورٹ میں مزید کہا گیا ہے کہ عورتوں کے اس جرثومے کا شکار ہونے کا اندیشہ زیادہ ہے کیونکہ زیادہ تر شادی شدہ عورتوں کو یہ جرثومہ اپنے شوہر سے ملتا ہے ۔