صلاح الدین دلی

ہندوستان کے وزیر خارجہ نٹور سنگھ نے ان خیالات کا اظہار یاسرعرفات کے جنازے میں شرکت کے بعد قاہرہ سے واپسی کے وقت صحافیوں سے بات چیت کے دوران کیا۔

مسٹر سنگھ سے جب یہ سوال کیا گيا کہ پاکستان کے صدر پرویز نے اپنی تجویز میں کہا ہے کہ کشمیر میں لائن آف کنٹرول کے دونوں طرف بھارت اور پاکستان کچھ علاقوں کی نشاندھی کرکے اسے فوج سے خالی کراکے آزاد علاقہ تسلیم کرلیا جائے۔ اس علاقے پر دونوں کا مشترک کنٹرول ہو یا پھر اقوام متحدہ کی نگرانی میں دیدیا جاۓ تو اس پر آپ کا ردعمل کیا ہے؟

نٹور سنگھ نے کہا کہ اس ماہ کے اواخرمیں پاکستان کے وزیراعظم شوکت عزیز کے ہندوستان دورے کے وہ منتظر ہیں۔ اور بھارت ان کے ساتھ ان تمام امور پر بامعنی بات چیت کریگا۔

بات چیت کے دوران مسٹر سنگھ نے کہا کہ انکی نظر میں اقوامتحدہ ہندوستان اور پاکستان کے درمیان متنازعہ مسائل حل کرنے میں کوئی خاص رول ادا نہیں کرسکتا۔ انہوں نے کہا کہ خود صدر مشرف نے کشمیر کے معاملے میں اقوام متحدہ کی قرار داد اور حق خودارادیت جیسی باتوں کا اب ذکر نہیں کر رہے ہیں۔

ان سے جب حال ہی میں امریکہ کے ایک حاکم رچرڈ آرمیٹیج کے اس بیان کے متعلق پوچھا کیا جس میں انہوں نے صدر مشرف کے بیان کی ستائش کی تھی تو انہوں نے کہا کہ کشمیر مسئلے کے حل کے لیے ہندوستان کسی تیسرے فریق کو شامل نہیں کریگا۔

مسٹر سنگھ نے کہا کہ امریکہ کی اس معاملے میں دلچسپی کی ہم تعریف کرتے ہیں لیکن اس معاملے میں کسی تیسرے فریق کو شامل کرنا ہندوستان کی پالیسی نہیں ہے۔