اس سے پہلے بھی سٹون نے سابق صدور پر فلمیں بنائی ہیں

اکسٹھ سالہ سٹون کا کہنا ہے کہ وہ صدر بش کی ایک سچی اور ایماندار تصویر لوگوں کے سامنے پیش کرنا چاہتے ہیں جس میں نہ صرف صدر بش کے حامیوں بلکہ ان کے ناقدین کو بھی حیران کر دے گی۔

سٹون نے بتایا کہ بش کے کردار ادا کرنے کے لیے جوش برولن سے بات کی ہے ۔اس سے پہلے بھی سٹون نے سابق صدور پر فلمیں بنائی ہیں جن میں جان ایف کینیڈی اور رچرڈ نکسن شامل ہیں۔

انہوں نے بتایا کہ اس وقت وہ فلم کے لیے سرمائے کا انتظام کر رہے ہیں اور فلم بندی کا کام اپریل میں شروع ہونے کی توقع ہے۔

ماضی میں سٹون نے گیارہ ستمبر کے حملوں پر صدر بش کے ردِ عمل پر تنقید کرتے ہوئے کہا تھا کہ انہوں ملک کو دس سال پیچھے دھکیل دیا ہے۔سٹون کا کہنا ہے کہ ’اس کھیل میں میں ریفری ہوں اور میں دیانتداری سے بش کی ایک سچی تصویر پیش کرنا چاہتا ہوں کہ وہ شراب کے نشے میں دھت رہنے والے ایک شخص سے دنیا کا طاقتور ترین انسان کیسے بنے۔

انہوں نے مزید کہا کہ فلم میں صدر کے اس عقیدے کو دکھایا جائے گا کہ ’خدا نے خود انہیں امریکہ کا صدر بنانے کے لیے منتخب کیا ہے‘۔

انہوں نے کہا کہ امید ہے کہ اس کردار کے لیے جوش برولن کی خدمات حاصل ہو جائیں گی جوحال ہی میں ’امریکن گینگسٹر‘ میں نظر آئے تھے۔سٹون کا کہنا ہے کہ جوش برولن دیکھنے میں بش سے بہتر ہیں لیکن ان کی شخصیت میں وہی کرشمہ ہے جو امریکی صدر بش میں دیکھتے ہیں۔