اداکاروں کی یونین کا کہنا ہے کہ وہ فلم نگاروں کا بھرپور ساتھ دے گی

یونین کے صدر ایلن روزنبرگ نے خبردار کیا ہے کہ اس کے ممبران فلم نگاروں کی کم معاوضوں کے خلاف جاری ہڑتال کے پیش نظراس تقریب میں قطعاً شرکت نہیں کریں گے۔

واضح رہے کہ فلم اور ٹیلی ویژن کی دنیا کے اداکاروں کو دیے جانے والے ایوارڈز میں گولڈن گلوب کو ایک بڑا مقام حاصل ہے اور آسکر کے بعد اسے اداکاری کے شعبے کا دوسرا بڑا اعزاز سمجھا جاتا ہے۔

مبصرین کا خیال ہے کہ مشہور اداکاروں کے بائیکاٹ کی وجہ سے شاید ٹیلی ویژن چینلز بھی اس تقریب کو ٹیلی کاسٹ نہ کریں۔ لاس اینجلس میں بی بی سی کے نامہ نگار پیٹر باؤں کا کہنا ہے کہ ایسی تقریب کا تصور ہی عجیب ہے کہ جس میں اداکاروں کے لیے انعامات کا اعلان ہو اور وہ یہ ایوراڈز وصول کرنے کے لیے موجود ہی نہ ہوں۔

فلم سازوں کے ساتھ یکجہتی
ایلن روزنبرگ نے اپنے بیان میں مزید کہا کہ ’ گزشتہ کئی ہفتوں کے دوران گولڈن گلوب ایوراڈز کے لیے نامزد اداکاروں اور ان کے نمائندوں سے گفت وشنید کے بعد ایسا لگتا ہے کہ ہم ایک متفقہ فیصلے پر پہنچ گئے ہیں کہ تمام مذکورہ اداکار اور اداکارائیں تقریب میں شریک نہیں ہوں گے۔‘

	ڈیوڈ لیٹر مین کا مشہور ٹاک شو دو ماہ تک بند رہا

فلم نگاروں کی یونین ’رائٹرز گِلڈ آف امیرکا‘ نے اداکاروں کی یونین کی طرف سے ان کی حمایت پر شکریہ ادا کیا ہے۔ یاد رہے کہ فلم نگاروں کی اس یونین نے گزشتہ نومبر سے کم معاضوں کے خلاف ہڑتال کی ہوئی ہے۔

فلم نگاروں کا کہنا ہے کہ ان کی تخلیقات کو جب فلم کی نمائش کے بعد انٹرنیٹ اور ڈی وی ڈیز کی شکل میں فروخت کیا جاتا ہے تو انہیں اسے اس کا معاوضہ نہیں دیا جاتا۔

فلم نگاروں کی یونین کا کہنا ہے وہ ایک ’ انتہائی اہم تحریک چلا رہی ہے جس کا مقصد فلم نگاروں کے معاوضوں اور انکے اشاعتی حقوق کا تحفظ کرنا ہے جس کے دو رس اثرات ہوں گے۔‘

اس ہڑتال کی وجہ سے ٹیلی ویژن پر نئے مزاحیہ پروگرام اور ڈرامے تقریباً نہ ہونے کے برابر رہ گئے ہیں، تاہم اس ہفتے ایک ’عبوری معاہدے‘ کے بعد ٹی وی ٹاک شوز سے دوبارہ شروع ہو گئے ہیں۔