 | | | جونی ڈپ اس فلم میں ہیروئن کے عادی کا کردار نبھا رہے ہیں |
ہالی وڈ کے مشہور اداکار جونی ڈپ کی نئی فلم’شنٹارم‘ مصنفین اور سکرپٹ رائٹرز کی ہڑتال کی وجہ سے التواء کا شکار ہوگئی ہے۔ ڈاونچی کوڈ سیریز کی فلم کے بعد یہ دوسری بڑی فلم ہے جو ہالی وڈ کے سکرپٹ رائٹرز کی ہڑتال کا نشانہ بنی ہے۔ اس کے علاوہ ران ہاورڈ اور اولیور سٹون جیسے ہدایتکاروں کی فلمیں بھی تاخیر کا شکار ہوئی ہیں۔ جیل سے فرار کے موضوع پر بنی اس فلم کی شوٹنگ فروری میں شروع ہونی تھی لیکن ہڑتال سے قبل سکرپٹ مکمل نہ ہونے کی وجہ سے اب اس میں تاخیر ہو گئی ہے۔ جونی ڈپ اس فلم میں ہیروئن کے عادی ایک ایسے آسٹریلین کا کردار ادا کر رہے ہیں جو جیل سے فرار ہو جاتا ہے۔ ادھر امریکی نیوز ٹی وی چینل سی بی ایس کے نیوز رائٹرز کے نمائندہ یونین رہنماؤں نے بھی ایک دیگر معاملے پر ہڑتال کرنے کا فیصلہ کیا ہے۔ اطلاعات کے مطابق نیویارک، لاس اینجلس، واشنگٹن اور شکاگو میں کام کرنے والے پانچ سو کے قریب ٹی وی اور ریڈیو کے نیوز رائٹر اپریل دو ہزار پانچ کے بعد سے بنا کسی معاہدے کے کام کر رہے ہیں۔ یاد رہے کہ رائٹرز گلڈ آف امریکہ کے ممبران نے پانچ نومبر کو رائلٹی کے معاملے پر ہڑتال شروع کی تھی اور ان کا مطالبہ ہے کہ انہیں فلموں کی ڈی وی ڈی اور انٹرنیٹ پر فروخت سے حاصل کردہ رقم میں سے حصہ دیا جائے۔ | 
ڈاونچی کوڈ سیریز فلم میں تاخیر
