شلپا خوبصورت اور ذاتی طور پر ایک اچھی خاتون ہیں: کیرل

اس شو کو دیکھنے والے تقریبًا دو ہزار ناظرین نے شکایت کی ہے کہ اس شو میں شلپا کے ساتھی انہیں محض ایک ہندوستانی ہونے کی وجہ سے نشانہ بنا رہے ہیں۔

شو کے چار شرکاء نے گزشتہ کئی دنوں سے شلپا کے خلاف مل کر محاذ سا بنا یا ہوا ہے۔ چینل فور کا کہنا ہے کہ وہ بگ برادر ہاؤس میں کئی دنوں سے لڑکیوں کے ہاتھوں رقابت کا نشانہ بنی ہوئی ہیں۔

جوڈی کی والدہ جیکی شو کے دوران شلپا کو ’انڈین‘ کہہ کر بلاتی رہیں اور وہ ان کے نام کو بھی درست طریقے سے ادا نہیں کر پا رہی تھیں۔

گزشتہ ویک اینڈ کے دوران سابق مس برطانیہ ڈینئل لائیڈ اور ایس کلب کی سابق اداکارہ جُو نے شلپا کے تلفظ کی ادائیگی کا مذاق اڑایا۔

آفکوم کے ایک ترجمان کا کہنا تھا’ادارے کو شلپا کے ساتھ نسلی امتیاز برتے جانے کی کوئی دو سو شکایتیں ملی ہیں۔ کئی ویب سائٹس پر اس موضوع پر بحث شروع ہو گئی ہے اور وہ (ویب سائٹس) لوگوں کو ہم سے رابطہ کرنے کی درخواست کر رہی ہیں۔ ہم تمام انفرادی شکایتوں پر غور کریں گے‘۔

بگ برادر شو سے باہر ہونے والی کیرل میلون کا کہنا تھا کہ انہیں یقین ہے کہ شلپا کے خلاف واقعات حسد کا نتیجہ ہیں۔

انہوں نے بی بی سی ایشین نیٹ ورک کو بتایا کہ شلپا نہ صرف خوبصورت بلکہ ذاتی طور پر بھی وہ ایک اچھی خاتون ہیں۔وہ حیران کن حد تک بااثر اور خوبصورت شخصیت کی مالک ہیں اور اس صورت حال کو کنٹرول کرنے کے ہنر سے واقف ہیں۔ وہ جب بگ بردر ہاؤس میں تھیں تو انہوں نے شلپا سے اس موضوع پر بات کی تھی۔

ان کا کہنا تھا کہ شلپا کے احساسات یہی ہیں کہ وہ ہندوستانی یا ایشیائی کمیونٹی کی نمائندگی کرتی ہیں اور وہ ہاؤس میں موجود دیگر افراد کی حرکتوں کے جواب میں ان جیسی حرکت کرکے اپنی کمیونٹی کا سر جھکانا نہیں چاہتی ہیں۔