محسن عباس ٹورانٹو، کینیڈا

	’کبھی الوداع نہ کہنا‘ بھی میلے میں دکھائی جائے گی

میلے میں امیتابھ بچن ، رانی مکر جی، ابھیشیک بچن، پریتی زنٹا اور شاہ رخ خان بالی وڈ کی نمائندگی کریں گے۔ اس کے علاوہ فلم ساز میرا نائر، دیپا مہتا اور کرن جوھر بھی میلے میں حصہ لے رہے ہیں۔ بالی وڈ کے ساتھ ساتھ دیگر مشہور اداکاروں میں چینی اداکارہ زانگ زی، بریڈ پٹ، فرانسیسی اداکار ڈینئل آتیل اور ہسپانوی اداکار پیڈرو الموڈور قابل ذکر ہیں۔

افتتاحی پروگرام کے دوران کَرن جوہر کی ’کبھی الوداع نہ کہنا‘ کو نمائش کےلیئے منتخب کیا گیا ہے۔ سات ستمبر سے سولہ ستمبر تک جاری رہنے والی اس میلے میں پانچ ہندوستانی فلمیں نمائش کےلیئے پیش کی جارہی ہیں۔

ٹورانٹو فِلم میلے کو شروع ہوئے تیس برس ہو چکے ہیں۔ اس بار میلے میں ہالی وڈ ، بالی وڈ اور دیگر ممالک کے 500 سے زائد نامور اداکار، ہدائتکار اور موسیقار شرکت کریں گے۔

پانچ سال قبل شاہ رخ خان کی فلم ’اشوکا‘ اس میلے میں نہ دکھائی جاسکی جسکی وجہ یہ تھی کے اس کا پرنٹ دوران گم ھوگیا تھا۔ اس برس شاہ رخ خان کو یہ اعزاز حاصل ہوگا کہ وہ اپنی حال ہی میں ریلیز ہونے والی فلم ’کبھی الوداع نہ کہنا‘ میلے کے افتتاحی پروگرام میں دیکھ سکیں گے۔

فلم ’کابل ایکسپریس‘ بھی اس فلمی میلے میں دکھائی جا رہی ہے جس میں حصہ لینے والے بھارتی اداکار جان ابراھیم گزشتہ سال ریلیز ہونیوالی فلم ’واٹر‘ کی وجہ سے پہلے ہی پہچانے جاتے ہیں۔

کبیر خان کی ’کابل ایکسپریس‘ کی کہانی11 / 9 کے بعد افغانستان میں پیش آنے والے کچھ ایسے واقعات کے گرد گھومتی ہے جو کہ صرف اڑتالیس گھنٹوں پر محیط ہیں۔

کبیر خان اب تک دستاویزی فلمیں بناتے رہے ہیں اور دستاویزی فلم بندی کے دوران انہیں کابل میں جو تجربات ہوئے اُنہی کو بنیاد بنا کر انہوں نے یہ فیچر فلم بنانے کا فیصلہ کیا۔

ٹورانٹو فلم فیسٹیول کی ڈائریکٹر نووا کووان نے بتایا کہ ٹورانٹو فلم فیسٹیول ہالی وڈ اور بالی وڈ کا ایک حسین ملاپ ہے۔

میلے میں تین سو باون سے زائد فلموں کی نمائش ہوگی جن میں دو سو اِکسٹھ فیچر فلمیں اور اکسٹھ شارٹ فلمیں شامل ہیں۔

دنیا کے اکسٹھ ممالک سے تین ہزار آٹھ سو تریسٹھ فلمیں اس میلے میں بھیجی گئیں جن میں سے تین سو باون فلموں کا انتخاب ہوا جبکہ پانچ بھارتی فلمیں میلے میں دکھائی جائیں گی-

	دیپا مہتا

ٹورانٹو شھر اور اس کے گردونواح میں لاکھوں کی تعداد میں بھارتی اور پاکستانی فلم بینوں کے علاوہ دوسرح قوموں کے لوگ بھی بالی وڈ کی فلموں کو شوق سے دیکھتے ہیں۔ میلے کے دوران بھارتی موسیقار بھی اپنے فن کا مظاہرہ کریں گے۔

بین الاقوامی فلمی صنعت کی اہم شخصیات اور دنیا بھر کے فلمی ستاروں کی موجودگی میں ٹورانٹو ہالی وڈ کا سماں پیش کر رہا ہے۔