میڈونا پر ان کے ایک گانے کی وجہ سے 1989 میں بھی تنقید کی گئی تھی

اٹلی میں مذہبی حلقے کنسرٹ میں میڈونا کے ایک گانے کے دوران حضرت عیسٰی کی تصلیب کی نقل اتارنے پر تنقید کر رہے ہیں۔

کیتھولک پادریوں کا کہنا ہے کہ ان کے اس عمل سے مذہب کی توہین کا پہلو نکلتا ہے۔ میڈونا کو اس وقت دنیا کی سب سے بڑی پاپ سٹار ہونے کا شرف حاصل ہے۔ ان کی گائیکی کا سفر تنازعات سے پُر ہے۔

اتوار کو وہ روم میں ویٹیکن سے محض چند کلو میٹر کی مسافت پر واقع اولپمک سٹیڈیم میں تقریبا پچھہتر ہزار افراد کے سامنے اپنے فن کا مظاہرہ کریں گی۔

کنٹسرٹ کے دوران اپنے ایک گانے ’لیو ٹُو ٹیل‘ کے دوران وہ خود کو شیشے سے بنی ایک صلیب پر لٹکائیں گی اور کانٹوں سے بنا تاج سر پر پہنیں گی۔

تعجب خیز بات یہ ہے کہ کیھتولک چر چ کے سینئر اراکین کی جانب سے حضرت عیسٰی کی تصلیب سے مشابہہ ان کے اس عمل کی مذمت نہیں کی گئی ہے۔

پوپ بینیڈکٹ کے ایک مشیر کارڈینل ارسیلیو میڈونا کے اس عمل کی مخالفت کرنے والوں میں سرفہرست ہیں اور ان کے مطابق ’میڈونا کی پوپ کے شہر میں پرفارمنس اور ان کا یہ عمل اُن شہیدوں پر ایک کھلا حملہ ہے‘۔

روم میں یہودی اور مسلمان رہنماؤں نے بھی تصلیب کی اس طرح سے نقل اتارنے کے عمل کی مذمت کی ہے۔ میڈونا کے ترجمان نے تنقید کے جواب میں پوپ بینی ڈکٹ کو میڈونا کی پرفارمنس کو بذات خود دیکھنے کی دعوت دی ہے۔ ان کے مطابق پوپ اس شو میں میڈونا کی پرفارمنس سے یقینًا محظوظ اور انہیں سراہیں گے۔

اییسا پہلی مرتبہ نہیں ہے کہ کیتھولک پاپ سٹار میڈونا پر کیتھولک فرقے کی جانب سے تنقید کی جا رہی ہے۔ 1989 میں بھی ان کے ایک گانے ’لائیک اے پرئیر‘ کی وجہ سے ان پر تنقید کی گئی تھی۔