صلاح الدین بی بی سی اردو ڈاٹ کام، دلّی

	عامر خان فلم ’رنگ دے بسنتی‘ کے ایک منظر میں

فضائیہ کو اس فلم کے بعض مناظر پراعتراض تھا اسی لیے دلّی میں اس کی خاص طور پر اسکرینگ کا انتظام کیا گیا تھا۔

’رنگ دے بسنتی‘ کی اسکرینگ کے موقع پر وزیر دفا‏ع پرنب مکھرجی، ادا کار عامر خان اور ہدایت کار پرکاش مہرا کے علاوہ سینسر بورڈ کی چیئر پرسن شرمیلا ٹیگور بھی موجود تھیں۔

شرمیلا ٹیگور نے اس موقع پر کہا کہ ’اس فلم میں قابل اعتراض کچھ بھی نہیں ہے‘۔

انہوں نے کہا کہ فلم بہت اچھی ہے۔ اس میں ملک کے ہیروز کو خراج عقیدت پیش کیا گیا ہے۔

فلم دیکھنے کے بعد فضائیہ کے ایک سینئر افسر ایئر مارشل پی ایس اہلو والیا نے نامہ نگاروں کو بتایا کہ ’ہمیں فلم کے کسی حصے پر کوئی اعتراض نہیں ہے۔ ہم نے اسے جیسی تھی ویسی ہی رہنے دیا ہے‘۔

فلم کی اسکرینگ سے قبل ایک افسر نے اس فلم کے مناظر کے بارے میں کچھ بھی کہنے سے انکار کردیا تھا۔

	اس فلم میں عامر نے ایک نوجوان طالب علم کا کردار ادا کیا ہے

’رنگ دے بسنتی‘ سنہ 2006 میں ریلیز ہونے والی پہلی قابل ذکر بھارتی فلم ہے۔

اطلاعات کے مطابق مذکورہ فلم میں سیاسی لیڈروں اور دفاعی شعبے کے اہلکاروں کو منفی طریقے سے پیش کیا گیا ہے۔ فلم میں بھارتی ایئر فورس کے ’مِگ‘ طیاروں کے متعدد حادثوں پر بھی طنز کیا گیا ہے۔

فضائیہ کو ان مناظر پر اعتراض تھا لیکن اطلاعات کے مطابق چونکہ فلم کا انداز افسانوی ہے اس لیے ان مناظر کی تبدیلی کے احکامات نہیں دیے گیے ہیں۔

رنگ دے بسنتی میں عامر خان نے اہم کردار ادا کیا ہے۔ یہ فلم جلد ہی ریلیز ہونے والی ہے۔

’رنگے دے بسنتی‘ کے ہدایت کار راکیش اوم پرکاش مہرا ہیں۔ فلم میں دکھایا گیا ہے کہ ایک نوجوان برطانوی فلم میکر تحریک آزادی میں حصہ لینے والے رہنماؤں پر فلم بنانے ہندوستان آتی ہے۔ یہ رول برطانوی اداکارہ الائیس پیٹن نے ادا کیا ہے جو ہانگ کانگ کے آخری گورنر کرس پیٹن کی بیٹی ہیں۔

فلم میں ادا کاری کے لیے وہ کالج کے بعض طلباء کا انتخاب کرتی ہیں۔ عامر خان نے ایک طالب علم کا کردار ادا کیا ہے۔

فلم میں اداکاری کے لیے الائیس کالج کے پانچ طلباء کو دعوت دیتی ہیں لیکن طلباء یہ کہہ کر انکار کردیتے ہیں کہ وہ ’فریڈم فائٹر‘ جیسے نہیں لگتے ہیں۔

گزشتہ برس عامر کی فلم منگل پانڈے تاریخی موضوع پر تھی اور اسکے کرداروں کے متعلق بھی تنازعہ ہوا تھا۔